Read Central Bicolano Psalms 81 Bible Online

Psalms 81 - Central Bicolano bible

Psalms 81

¹Mag-awit nin makosog sa Dios na satong parasurog; magkurahaw kita sa kaogmahan sa Dios ni Jacob!

²Kosogon an awit, patanogon an mga tamborin; magtugtog sa mahamis na tanog kan mga arpa saka lira.

³Patanoga nindo an trompeta sa aldaw nin pyesta, kun gimata an bulan asin kun kabilogan kaiyan.

⁴Iyo ini an pagsusundon sa Israel, sarong kabotan hale sa Dios ni Jacob.

⁵Itinao niya iyan sa banwaan nin Israel kan salakayon niya an daga nin Egipto. Sarong tingog na bako kong midbid an nadangog kong nagsabi,

⁶“Hinale ko an gabat sa saindong abaga; pinapahingalo ko an saindong mga kamot sa pagbitbit kan basket.

⁷Kan kamo nasa kahorasaan, inapod nindo ako asin ilinigtas ko kamo. Hale sa pinagtatagoan kong daguldol, sinimbag ko kamo. Binalo ko kamo duman sa mga burabod nin Meriba.

⁸Banwaan ko, dangoga an sakong patanid; Israel, kun magdangog ka lamang sako!

⁹Dai ka nanggad magsamba sa ibang dios.

¹⁰Ako an Kagurangnan na saimong Dios, na nagluwas saimo hale sa daga nin Egipto. Bukaha an saimong ngoso, asin papakakanon taka.

¹¹“Alagad habong magdangog sako an sakong banwaan; habo akong kuyogon nin Israel.

¹²Kaya pinabayaan ko sinda sa katagasan kan saindang mga payo tanganing masunod ninda an sadiri nindang mga mawot.

¹³Kun magdangog kuta sako an sakong banwaan; kun magsunod kuta an Israel sa sakong mga dalan!

¹⁴Dadaogon ko tolos an saindang mga kaiwal, asin sasakopon an saindang mga kalaban.

¹⁵Sa atubang ko, maduko sa takot an mga naaanggot sako; an saindang padusa magdadanay sagkod lamang.

¹⁶Alagad ipapakakan ko saindo an pinakamarahay na trigo asin babasogon ko kamo sa dugos na hale sa gapo.”