Read Central Bicolano Psalms 84 Bible Online

Psalms 84 - Central Bicolano bible

Psalms 84

¹Magayonon an saimong erokan, O Kagurangnan nin mga hukbo!

²An sakong kalag napupungaw asin naghihidaw sa mga patyo nin Kagurangnan. An sakong puso asin hawak nag-aawit sa kaogmahan sa Dios na buhay.

³Maski an dignos nakakakua nin harong, asin an balinsayawan nakakakua nin sadiring salagan para sa saiyang mga siwo, diyan sa harani kan saimong mga altar, O Kagurangnan nin mga hukbo, sakong Hade asin sakong Dios.

⁴Paladan an mga nag-eerok sa saimong harong; danay na inaawit ninda an saimong kaomawan.

⁵Paladan sinda na an kosog yaon saimo, na nasa puso an mga dalan pasiring sa Sion.

⁶Mantang linalakaw ninda an kapantayan nin Baca, ini ginigibo nindang sarong lugar nin mga burabod; ini pinapano man nin mga sapa kan amay na uran.

⁷Mantang naglalakaw, orog na minakosog sinda; mahihiling ninda an Dios nin mga dios sa Sion.

⁸Kagurangnan, Dios nin mga hukbo, hinanyoga an sakong pamibi. Himatea, O Dios ni Jacob!

⁹Bendisyonan mo an samong hade, O Dios; an hade na saimong pinili.

¹⁰Sarong aldaw sa laog nin saimong mga patyo orog na marahay ki sa sangribong aldaw sa ibang lugar. Papaorogon ko an magtindog sa trangkahan kan harong nin sakong Dios, ki sa mag-erok sa harong nin mga tampalasan.

¹¹An Kagurangnan iyo an samong parasurog asin mamurawayon na hade; benebendisyonan niya kami nin karahayan asin onra. Karahayan dai niya isasayuma sa mga naggigibo nin matanos.

¹²Kagurangnan, Dios nin mga hukbo, paladan an tawo na minasarig saimo!