Read Central Bicolano Psalms 85 Bible Online

Psalms 85 - Central Bicolano bible

Psalms 85

¹Kagurangnan, naherakan mo an saimong daga; ibinalik mo an mga kayamanan ni Jacob.

²Pinatawad mo an kasombikalan kan saimong banwaan; pinatawad mo an gabos nindang kasalan.

³Pinugol mo an saimong kaanggotan; pinakulpa mo an labi-labi mong kaanggotan.

⁴Ibalik mo kami, O Dios nin samong kaligtasan; halea an saimong hinanakit sa samo.

⁵Maaanggot ka daw samo sagkod lamang? Papahaloyon mo daw an saimong kaanggotan sagkod sa gabos na kapagarakian?

⁶Ibalik mo giraray samo an buhay, tanganing mag-ogma sa saimo an banwaan mo.

⁷Ipahiling mo an danay mong pagkamoot, Kagurangnan, asin itao mo samuya an saimong kaligtasan.

⁸Nagdadangog ako kan itinataram nin Dios na Kagurangnan, huli ta ipinapahayag niya an katoninongan sa saiyang banwaan, sa saiyang mga banal, na dai na mabalik sa saindang kasombikalan.

⁹Totoong harani na an kaligtasan para sa mga may pagkatakot saiya, nganing an kamurawayan mag-erok sa daga.

¹⁰An pagkamoot asin an pagkamaimbod magtutuparan; an katanosan asin an katoninongan maghahadokan.

¹¹An pagkamaimbod matalubo sa daga; an katanosan madungaw hale sa langit.

¹²Papauswagon kita nin Kagurangnan; dakul an magigin ani kan satong kaomahan.

¹³An katanosan mangengenot sa Kagurangnan, maandam kan dalan na saiyang lalakawan.