Read Central Bicolano Psalms 86 Bible Online

Psalms 86 - Central Bicolano bible

Psalms 86

¹Hinanyoga ako, Kagurangnan, asin simbaga, huli ta ako mayong sukat asin dukha.

²Ligtasan an buhay ko, huli ta maimbod ako; ligtasan an saimong sorogoon na minasarig saimo.

³Ika an sakuyang Dios; kaheraki ako, Kagurangnan; huli ta minaagrangay ako saimo sa bilog na aldaw.

⁴Paogmaha an saimong sorogoon, Kagurangnan, huli ta sa saimo iniitaas ko an sakuyang kalag.

⁵Kagurangnan, ika marahay saka mapagpatawad, mayaman sa danay na pagkamoot sa gabos na nag-aapod saimo.

⁶Hinanyoga, Kagurangnan, an sakong pamibi; himatea an tingog nin sakong pakimaherak.

⁷Sa aldaw nin sakong kasakitan minaapod ako saimo, huli ta ako sinisimbag mo.

⁸Sa mga dios mayo nin arog saimo, Kagurangnan; mayong gibo na makakaarog sa saimong mga gibo.

⁹Madatong an gabos na nasyon na saimong linalang; mataong galang sa saimong atubang; asin mapamuraway kan saimong ngaran.

¹⁰Dakula ka asin naggigibo nin mga ngangalasan; ika sana nanggad an Dios.

¹¹Kagurangnan, itukdo mo sako an saimong dalan, tanganing maglakaw ako sa saimong katotoohan, bilog na pusong matakot sa saimong ngaran.

¹²Sa bilog kong puso nagpapasalamat ako saimo, Kagurangnan kong Dios; oomawon ko an saimong ngaran sagkod lamang.

¹³Huli ta dakula an danay mong pagkamoot sa sako; asin hinawas mo sa kairaroman nin Sheol an kalag ko.

¹⁴O Dios, nagtirindog tumang sako an mga mapaabaw-abaw; boot akong gadanon kan mga tampalasan, mga tawo na habong maghinanyog saimo.

¹⁵Alagad ika, Kagurangnan, sarong Dios na maheherakon asin mamomoton, maluway sa pag-anggot saka mayaman sa danay na pagkamoot asin pagkamaimbod.

¹⁶Lilingya ako asin kaheraki; tawe kan saimong kosog an saimong sorogoon, asin ligtasan an aking lalaki kan babae mong oripon.

¹⁷Kagurangnan, pahilingan sako an tanda kan saimong pagkamaheherakon, tanganing masopog an mga anggot sako, kun mahiling ninda na rinaranga asin tinatabangan mo ako.