Read Central Bicolano Psalms 89 Bible Online

Psalms 89 - Central Bicolano bible

Psalms 89

¹Aawiton ko sagkod pa man an danay mong pagkamoot, Kagurangnan; irurukyaw ko an saimong kaimbodan sa gabos na kapagarakian.

²Huli ta an pagkamoot mo magdadanay sagkod pa man; an kaimbodan mo masarig siring sa kalangitan.

³Ika nagtaram, “Ako nakipagtipan sa tawong sakong pinili; ako nanuga ki David na sakong sorogoon:

⁴‘An saimong kapagarakian magigin hade sagkod pa man; an saimong trono papatindogon ko sa gabos na panahon.’”

⁵Awiton logod kan kalangitan an saimong mga ngangalasan, O Kagurangnan, an saimong kaimbodan sa katiriponan nin mga banal!

⁶Huli ta siisay sa langit an ikakaarog sa Kagurangnan? Siisay sa mga langitnon na linalang an arog sa Kagurangnan?

⁷Siya sarong Dios na ginagalangan sa katiriponan nin mga banal; dakula asin kinatatakotan kan gabos na nasa palibot niya.

⁸Kagurangnan, Dios nin mga hukbo, mayo nin arog saimo kamapangyari; ika maimbod sa gabos na bagay, Kagurangnan.

⁹Nasasakopan mo an kosog kan dagat; pinapatoninong mo an anggot kaining mga alon.

¹⁰Rinonot mo an impaktong si Rahab asin saimong ginadan; huli kan saimong kosog dinaog mo an saimong mga kaiwal.

¹¹Sadiri mo an langit, siring man an daga; linalang mo an kinaban asin an gabos na yaon diyan.

¹²An amihan asin an habagat saimong linalang; an Tabor asin an Hermon maogmang minaomaw kan saimong ngaran.

¹³Mapangyari an saimong takyag, Kagurangnan; an saimong kosog dai mapapantayan.

¹⁴Katanosan asin hustisya an mga pundasyon kan saimong trono; pagkamoot asin kaimbodan nahihiling sa gabos mong gibo.

¹⁵Paladan an mga tawong nagsasamba saimo huli sa mga awit, na naglalakaw sa liwanag nin saimong lalawogon!

¹⁶Huli saimo nag-oogma sinda sa bilog na aldaw, asin nag-oomaw sinda huli kan saimong katanosan.

¹⁷Tinawan mo kami nin darakulang panggana; sa pagkamoot mo kami saimong pinapanggana.

¹⁸Kagurangnan, ika an nagpili kan samong parasurog; Banal na Dios nin Israel, ika an nagtao samo kan samong hade.

¹⁹Sa sarong bisyon kaidto, nagtaram ka sa saimong maimbod na mga sorogoon, “Tinabangan ko an sarong bantog na soldados; itinao ko an trono sa tawong pinili ko hale sa banwaan.

²⁰Ginibo kong hade si David na sakuyang sorogoon, sa paagi nin paglahid saiya kan banal na lana.

²¹An sakuyang kosog magdadanay saiya, an sakuyang kapangyarihan iyo an magpapakosog saiya.

²²Dai manggagana tumang saiya an mga kaiwal niya; an mga tampalasan dai makakadaog saiya.

²³Roronoton ko an saiyang mga kaiwal, asin gagadanon an gabos na naoongis saiya.

²⁴An sakong kaimbodan asin danay na pagkamoot mapapasaiya, sa ngaran ko ipagbabantog an kosog niya.

²⁵Papadakulaon ko an saiyang kahadean magpoon sa Mediteraneo sagkod sa Salog nin Eufrates.

²⁶Masabi siya sako, ‘Ika an sakuyang Ama, sakuyang Dios, asin an Gapo nin sakuyang kaligtasan!’

²⁷Gigibohon ko siyang aki kong matua, an pinakahalangkaw sa mga hade kan daga.

²⁸Danay kong ootobon an sakuyang panuga saiya, magdadanay an sakuyang tipan saiya.

²⁹Papadanayon ko an saiyang kapagarakian nin mga hade sagkod lamang; an saiyang kahadean magdadanay siring sa kalangitan.

³⁰“Alagad kun an katogonan ko talikodan kan saiyang kapagarakian, asin dai sinda mamuhay sosog sa sakong kabotan,

³¹kun saindang lapason an sakong mga katukdoan, asin dai sinda mag-otob kan sakong mga katogonan,

³²dangan papadusahan ko sinda huli kan saindang mga kasalan; papatioson ko sinda huli kan saindang mga karatan.

³³Alagad an danay kong pagkamoot ki David dai ko hahaleon; dai ko lilingawan an sakong panuga saiya.

³⁴Dai ko lalapason an sakong tipan, o liliwaton an tataramon na nagluwas sa sakong ngoso.

³⁵“Makasaro akong nagsumpa huli kan sakong kabanalan: dai nanggad ako maputik ki David.

³⁶An saiyang kapagarakian nin mga hade magdadanay sagkod lamang; babantayan ko an saiyang kahadean sagkod na nagliliwanag an aldaw.

³⁷Magdadanay iyan sagkod pa man siring kan bulan, an maimbod na saksi sa kalangitan.”

³⁸Alagad ngunyan saimong isinikwal asin tinalikodan; anggot ka nin marahay sa saimong linahidan.

³⁹Linapas mo an tipan sa saimong sorogoon; an saiyang korona itinapok mo sa laboy.

⁴⁰Rinumpag mo an mga kudal kan saiyang syudad; binayaan mong raot an saiyang mga bantayan.

⁴¹Gabos niyang rogaring hinahabon kan gabos na minaagi; nagin siyang ngingisihan kan saiyang mga kataed.

⁴²Pinagana mo an saiyang mga kaiwal; pinaogma mo an gabos niyang kalaban.

⁴³Pinangurol mo an tarom nin saiyang espada, asin ipinadaog mo siya sa gera.

⁴⁴Hinale mo an setro sa saiyang kamot, asin itinapok mo sa daga an saiyang trono.

⁴⁵Pinagurang mo siya nin sala sa panahon; tinahoban mo siya nin kasopogan.

⁴⁶Sagkod nuarin, Kagurangnan? Matago ka daw sagkod pa man? Sagkod nuarin malaad siring sa kalayo an saimong kaanggotan?

⁴⁷Giromdoma kun gurano kahalipot an sakuyang buhay; giromdoma na linalang mo kami gabos na may kagadanan!

⁴⁸Siisay an tawong pwedeng mabuhay asin dai nanggad magadan? Siisay an makakaligtas kan saiyang kalag sa kapangyarihan nin lulubngan?

⁴⁹Kagurangnan, haen na an danay mong pagkamoot kaidto, na isinumpa mo ki David sa saimong pagkamaimbod?

⁵⁰Giromdoma, Kagurangnan, kun paano tinutuya-tuya an saimong sorogoon, kun paano ko dinadara sa sakuyang daghan an mga maldisyon kan mga pagano.

⁵¹Kagurangnan, an saimong linahidan tinutuya-tuya kan saimong mga kaiwal! Pinag-oolog-olog saen man siya magduman.

⁵²Pag-omawon an Kagurangnan sagkod pa man! Amen! Amen!