Read Central Bicolano Psalms 9 Bible Online

Psalms 9 - Central Bicolano bible

Psalms 9

¹Pasasalamatan taka, Kagurangnan, sa bilog kong puso; ibabalangibog ko an gabos mong ngangalas na gibo.

²Huli saimo, mag-aawit ako sa kaogmahan. Mag-aawit ako nin pag-omaw saimo, O Dios na Makakamhan.

³Kan mag-abot ka, nagdurulag an sakong mga kaiwal; nagkaturumba sinda saka nagkagaradan.

⁴Marahayon ka asin matanos sa saimong mga paghatol; sinurog mo ako kan ika maghukom.

⁵Sinagwe mo an mga nasyon, rinonot mo an mga maraot; pinara mo an saindang ngaran sagkod lamang.

⁶Napara sagkod lamang an satong mga kaiwal; rinumpag mo an saindang mga syudad; dai na sinda nagigiromdoman.

⁷Alagad an Kagurangnan hade sagkod lamang; pinatindog niya an saiyang trono sa paghukom.

⁸Pinaghahadean niya an kinaban sa katanosan; an mga banwaan matanos niyang hinuhukoman.

⁹An Kagurangnan sarong pailihan para sa mga inaapi; sarong pailihan sa panahon nin kasakitan.

¹⁰An mga nakakamidbid saimo, Kagurangnan, magsasarig saimo; huli ta dai mo binabayaan an mga naghahanap saimo.

¹¹Mag-awit kamo nin pag-omaw sa Kagurangnan, na naghahade sa Sion! An mga ginibo niya ibareta nindo sa lambang nasyon!

¹²Ginigiromdom nin Dios an mga nagtitios; dai niya nalilingawan an saindang inagrangay, asin an naggigibo sainda nin maraot saiyang pinapadusahan.

¹³Maherak ka sako, O Kagurangnan! Hilinga an sakong mga kasakitan na gibo kan sakong mga kaiwal! Ligtasan ako sa kagadanan, O Kagurangnan,

¹⁴tanganing ipahayag ko an saimong mga kaomawan, tanganing sa atubang kan mga taga Jerusalem, mag-ogma ako sa saimong kaligtasan.

¹⁵An mga pagano nahulog sa kalot na saindang ginibo; an saindang bitis nasiod sa hikot na saindang tinago.

¹⁶Nagpamidbid an Kagurangnan huli kan saiyang mga matanos na hatol; an mga maraot nagkasiriod kan sadiri nindang gibo.

¹⁷An kagadanan iyo an padudumanan kan gabos na maraot, kan gabos na nakakalingaw sa Dios.

¹⁸An mga daing sukat bakong danay na lilingawan; an paglaom kan mga dukha dai mawawara sagkod lamang.

¹⁹Madya, Kagurangnan! Hare pagtugot na magtumang saimo an mga tawo! Daraha sa atubang mo an mga pagano asin sinda hukoman mo.

²⁰Gibohang matakot sinda, Kagurangnan; pasabota sinda na sinda tawo lamang.