Read Central Bicolano Psalms 90 Bible Online

Psalms 90 - Central Bicolano bible

Psalms 90

¹Kagurangnan, ika an samuyang erokan sa gabos na henerasyon.

²Bago lalangon an kabukidan, bago mahaman an daga asin an kinaban, ika Dios na mayong kapinonan asin mayong kataposan.

³An tawo ibinabalik mo sa alpog; tinataraman mo, “Bumalik kamo, mga aki nin tawo!”

⁴Sa saimong atubang, an sangribong taon garo sana sarong aldaw na nag-agi, o apat na oras nin pagpuka sa banggi.

⁵Pinapara mo an tawo siring sa pangatorogan, garo doot na minatalubo pagkaaga:

⁶minatalubo pagkaaga asin minaburak; pagkabanggi naluluyos saka nagagadan.

⁷Kami natutunaw huli sa saimong kaanggotan; kami natatakot huli sa saimong labi-labing kaanggotan.

⁸Hayag sa atubang mo an samong mga kasalan; an mga hilom nyamong kasalan sa liwanag nin saimong lalawogon.

⁹Sa saimong kaanggotan minahalipot an samuyang buhay; napapara ini na garo saro sanang inagrangay.

¹⁰Setentang taon an lawig kan samuyang buhay, o gayod otsenta kun kami makosog. Alagad mga taon na nagdadara nin kasakitan asin kamondoan; gabos minaagi sana, dangan napapara an samuyang buhay.

¹¹Siisay an nakakasabot kan makuri mong kaanggotan? Siisay an nakakaaram kan takot na dara kan saimong kaanggotan?

¹²Ipasabot mo samuya na bilang sana an samong mga aldaw, tanganing magkaigwa kami nin kadonongan.

¹³Sagkod nuarin, Kagurangnan, an saimong kaanggotan? Kaheraki an saimong mga sorogoon.

¹⁴Pagkaaga panoa kami kan danay mong pagkamoot, tanganing mag-awit kami asin mag-ogma sa bilog nyamong pagkabuhay.

¹⁵Tawe kami nin kaogmahan na katimbang kan kamondoan na itinao mo samo, kan mga taon nin samuyang kasakitan.

¹⁶An saimong mga gibo ipahiling mo sa saimong mga sorogoon; an saimong kapangyarihan ipahiling mo sa samong kapagarakian.

¹⁷Kagurangnan nyamong Dios, mapasamuya an saimong mga biyaya; pauswaga an gabos ming mga gibo.