Read Central Bicolano Psalms 94 Bible Online

Psalms 94 - Central Bicolano bible

Psalms 94

¹Kagurangnan, ika sarong Dios na nagpapadusa; pahilingan an saimong kaanggotan!

²Magtindog ka, O hukom nin kinaban; tawan sa mapaabaw-abaw an maninigo sainda!

³Sagkod nuarin mag-oogma an mga maraot? Sagkod nuarin Kagurangnan?

⁴Sagkod nuarin maghahambog an mga kriminal asin magpapaabaw-abaw kan saindang mga gibo?

⁵Rinoronot ninda an saimong banwaan, Kagurangnan; inaapi ninda an saimong pamana.

⁶Ginagadan ninda an mga balo asin an mga ilo; ginagadan ninda an mga dayuhan na nag-eerok sa samong daga.

⁷Nagsasarabi sinda, “Dai kita nahihiling kan Kagurangnan; dai nakakamangno an Dios nin Israel.”

⁸Pakasabota nindo, mga tawong patal! Mga lolong, nuarin nindo masasabotan?

⁹Ginibo nin Dios an satong talinga—dai daw siya nakakadangog? Ginibo niya an satong mga mata—dai daw siya nakakahiling?

¹⁰Siya an nagsasagwe sa mga nasyon—dai daw niya sinda papadusahan? Siya an paratukdo kan gabos na tawo—mayo daw siya nin pakaaram?

¹¹Aram nin Kagurangnan an nasa isip nin mga tawo; sinda siring sana sa sarong hinangos.

¹²Paladan an tawo na sinasagwe mo, Kagurangnan, an tinutukdoan mo kan saimong togon!

¹³Tinatawan mo siyang kapahingaloan sa mga aldaw nin kasakitan sagkod na makalot an kutkot para sa mga tampalasan.

¹⁴Dai pababayaan nin Kagurangnan an saiyang banwaan; an sadiri niyang pamana dai niya tatalikodan.

¹⁵An hustisya makakabalik sa mga hukoman, asin susunodon iyan kan mga matanos.

¹⁶Siisay an nagtindog para sako tumang sa mga tampalasan? Siisay an nag-apil sako tumang sa mga paragibo nin karatan?

¹⁷Kun dai ako tinabangan nin Kagurangnan, napadali kutana an pagduman ko sa daga nin mga gadan.

¹⁸Kan magsaboot ako, “Nahuhulog ako,” an saimong danay na pagkamoot, Kagurangnan, an nagpugol sako.

¹⁹Kan ako nahahandal asin nahahadit, rinaranga asin pinapaogma mo ako.

²⁰Tutugotan mo daw na mag-apil saimo an mga maraot na hukom, na minabiko kan katanosan sa paagi nin mga pagboot,

²¹na nagmamawot nin maraot tumang sa mga matanos na tawo asin minakondenar sa kagadanan sa mga mayo nin kasalan?

²²Alagad sinusurog ako nin Kagurangnan; iniingatan ako kan sakuyang Dios.

²³Papadusahan niya sinda huli kan saindang karatan, tutunawon niya sinda huli kan saindang mga kasalan; gagadanon sinda nin Kagurangnan na satuyang Dios.