Read Central Bicolano Psalms 95 Bible Online

Psalms 95 - Central Bicolano bible

Psalms 95

¹Madya, awitan nyato an Kagurangnan; maogmang omawon ta an gapo nin satong kaligtasan!

²Dumolok kita sa saiyang atubang na may pasalamat; sa kaogmahan mag-awit kita saiya nin mga awit nin pag-omaw!

³Huli ta an Kagurangnan sarong dakulang Dios asin sarong mapangyaring Hade sa gabos na dios.

⁴Nasa saiyang kamot an mga kairaroman kan daga; saiya man an mga kalangkawan nin kabukidan.

⁵Saiya an dagat, huli ta ini ginibo niya; huli ta an mamarang daga hinaman kan saiyang mga kamot.

⁶Madya, magduko asin magsamba kita, lumuhod kita sa atubang nin Kagurangnan na satong Kaglalang!

⁷Huli ta siya an satong Dios; kita an banwaan na saiyang inaataman, an mga karnero na saiyang pinapakakan. Hinanyoga nindo ngunyan an saiyang tingog!

⁸“Hare pagpatagasa an saindong mga puso, siring duman sa Meriba, siring kan aldaw sa Massa duman sa kalangtadan,

⁹kan ako binalo kan saindong mga ginikanan, asin pinagprobaran, maski nahiling ninda an sakuyang mga gibo.

¹⁰Nabaldi ako sa henerasyon na idto sa laog nin kwarentang taon. Nagtaram ako, ‘Sinda sarong banwaan na nagkakasala sa puso, asin dai ninda sinusunod an sakong mga dalan.’

¹¹Kaya nagsumpa ako sa sakuyang kaanggotan, na dai nanggad sinda makakalaog sa sakong pahingaloan.”