Read Central Bicolano Psalms 98 Bible Online

Psalms 98 - Central Bicolano bible

Psalms 98

¹Mag-awit nin bagong awit sa Kagurangnan, huli ta guminibo siya nin mga ngangalasan! Sa sadiri niyang kapangyarihan asin banal na kosog nakamtan niya an kapangganahan.

²Ipinahayag nin Kagurangnan an saiyang kapangganahan; ipinahiling niya sa mga nasyon an saiyang kapangyarihan sa pagligtas.

³Naromdoman niya an danay niyang pagkamoot asin pagkamaimbod sa harong ni Israel. Nahiling kan gabos na poro kan daga an kapangganahan kan satuyang Dios.

⁴Gabos na daga maogmang magkurahaw sa Kagurangnan; omawon siya sa mga awit asin sa mga kurahaw nin kaogmahan!

⁵Mag-awit nin mga pag-omaw sa Kagurangnan! Musika tugtogon sa arpa!

⁶Patanogon an mga trompeta asin an mga hamodyong; maogmang magkurahaw sa Kagurangnan na satuyang hade.

⁷Maghagubohob an dagat asin an gabos na yaon diyan; an kinaban asin an gabos na nag-eerok diyan.

⁸Pumarakpak an mga katubigan; sabay na mag-arawit sa kaogmahan an kabubuldan sa atubang nin Kagurangnan,

⁹huli ta madatong siya tanganing maghukom sa daga. Maghuhukom sa mga banwaan nin kinaban sa katanosan asin sa katotoohan.