Read Central Bicolano Psalms 99 Bible Online

Psalms 99 - Central Bicolano bible

Psalms 99

¹An Kagurangnan naghahade; magtakig an mga banwaan. Nagtutukaw siya sa saiyang trono, sa ibabaw kan mga kerubin; maglinog an daga.

²An Kagurangnan bantog sa Sion; siya orog na halangkaw sa gabos na nasyon.

³An lambang saro mag-oomaw kan saiyang dakula asin ginagalangan na ngaran. Siya banal!

⁴Mapangyaring hade, namomoot ka sa hustisya; pinapangyari mo an katanosan sa Israel; nagdara ka nin hustisya asin katanosan.

⁵Pag-omawon an Kagurangnan na satuyang Dios; sa atubang kan saiyang trono, sambahon siya! Siya banal!

⁶Kabilang sa mga padi niya si Moises saka si Aaron, kabilang sa mga nag-arang kan ngaran niya si Samuel. Nag-apod sinda sa Kagurangnan, asin sinimbag niya sinda.

⁷Nagtaram siya sainda hale sa hariging panganoron; kinuyog ninda an mga togon saka pagboot na itinao niya sainda.

⁸Kagurangnan nyamong Dios, sinimbag mo sinda; para sainda ika an Dios na nagpapatawad, alagad nagpapadusa kan saindang mga maraot na gawe.

⁹Pag-omawon an Kagurangnan nyamong Dios, asin sambahon siya sa saiyang banal na bulod! Huli ta banal an Kagurangnan na samuyang Dios.