Read Central Bicolano Proverbs 10 Bible Online

Proverbs 10 - Central Bicolano bible

Proverbs 10

¹Uya an mga talinhaga ni Solomon: An madonong na aki ikinakaogma nin saiyang ama. Alagad an lolong na aki sarong kamondoan nin saiyang ina.

²An kayamanan na nakua huli sa pandadaya dai minatao nin karahayan, alagad an pagigin onesto pwedeng magligtas kan saimong buhay.

³Dai pinapabayaan nin Kagurangnan na magutom an mga matanos, alagad an kamawotan kan mga tawong maraot dai niya itinutugot na mangyari.

⁴An pagigin hugakon iyo an madara saimo sa kadukhaan, alagad an pagigin mahigos iyo an mapayaman saimo.

⁵An tawong nagtitipon kun tig-init igwa nin marahay na kaisipan, alagad an pagkatorog sa panahon nin tig-anihan, sarong kasosopgan.

⁶An mga bendisyon maabot sa matanos, alagad an ngoso kan maraot nagtatago nin kadahasan.

⁷An matanos ginigiromdom bilang bendisyon, alagad an maraot malilingawan.

⁸An marahay na hatol inaako kan pusong madonong, alagad mapapahamak an lolong na matinaram.

⁹An naglalakaw sa katanosan naglalakaw na matiwasay, alagad madadakop an may bikong pamumuhay.

¹⁰Nakakaparibok an tawong nagtatago kan katotoohan, alagad an tawong hayag na minasagwe nagtatrabaho para sa katoninongan.

¹¹An ngoso kan matanos burabod nin buhay, alagad an sa maraot na tawo nagtatago nin kadahasan.

¹²An pagkaongis danay na naghahanap nin iwal, alagad an pagkamoot iyo an nagtatahob kan gabos na kasalan.

¹³Sa mga ngabil kan may pakasabot manunumpongan an kadonongan, alagad pamakol an dapat sa likod kan tawong mayo nin toltol na kaisipan.

¹⁴An madonong nagsasaray nin kadonongan, alagad minaharani an kapahamakan kun minataram an lolong.

¹⁵An kayamanan iyo an nag-iingat sa mga mayaman; an kadukhaan iyo an minaraot sa dukha.

¹⁶Buhay an premyo sa paggibo nin marahay, alagad an kasalan namumunga nin orog pang kasalan.

¹⁷An naghihinanyog kun sinasaway mabubuhay, alagad an dai minaako kan saindang kasalan nasa pag-alaman.

¹⁸Putikon an tawong igwa nin natatagong kaanggotan; lolong an tawong nagbabalobagi.

¹⁹Kun mas dakul an tataramon, dakul man an kasalan; an igwa nin marahay na isip, bakong matinaram.

²⁰An mga tataramon kan matanos nakakaarog sa purong plata: an kaisipan kan maraot mayo nin halaga.

²¹An mga tataramon kan matanos papakinabangan nin dakul na tawo, alagad pwedeng magadan an lolong huli kan saiyang kapatalan.

²²An bendisyon nin Kagurangnan nakakapayaman, asin dai niya iyan dinadagdagan nin kamondoan.

²³An paggibo nin maraot kaogmahan nin sarong lolong; alagad an marahay na gawe kaogmahan nin tawong may pakasabot.

²⁴An natatakotan kan maraot na tawo mangyayari saiya, alagad an kamawotan kan matanos itatao saiya.

²⁵Minaabot an bagyo asin ipinapalid an maraot, alagad an matanos danay na ligtas.

²⁶Garo maalsom na suka saka asong nakakapaluha an sarong hugakon sa nagsusugo saiya.

²⁷An pagkatakot sa Kagurangnan nagpapahalawig nin buhay, alagad halipot an mga taon kan maraot na tawo.

²⁸An paglaom kan matanos minatapos sa kaogmahan, alagad an paglaom kan maraot minatapos sa kawaraan.

²⁹Iniingatan nin Kagurangnan an mga matanos, alagad ginagadan niya an mga naggigibo nin karatan.

³⁰Danay na magkakaigwa nin katiwasayan an matanos, alagad dai magdadanay sa daga an maraot.

³¹Kadonongan an minaluwas sa ngoso kan matanos, alagad an dila na nagtataram nin karatan puputolon.

³²An matanos nagtataram kan mahuyong tataramon, alagad an maraot nagtataram kan mga bagay na nakakakulog.