Read Central Bicolano Proverbs 11 Bible Online

Proverbs 11 - Central Bicolano bible

Proverbs 11

¹Ikinakauyam nin Kagurangnan an timbangan na may daya. Naoogma siya sa timbangan na tama.

²Kun minaabot an kapaabaw-abawan, minaabot man an kasosopgan; an kadonongan yaon sa mapakumbaba.

³An pagigin onesto an giya kan matanos, alagad an madaya mararaot kan sadiri nindang kabikoan.

⁴Sa aldaw nin kagadanan mayo nin pakinabang an kayamanan, alagad an katanosan iyo an maligtas kan saimong buhay.

⁵An pagkamatanos kan sarong marahay na tawo iyo an minapagian kan saiyang buhay, alagad an karatan kan maraot iyo an minapahamak saiya.

⁶An pagkamatanos iyo an minaligtas sa onestong tawo, alagad an dai masasarigan na tawo nasisiod sa sadiri niyang kapasloan.

⁷Kun nagagadan an maraot, an saiyang paglaom nagagadan kaiba niya. An pagsarig sa kayamanan nawawaraan nin halaga.

⁸An matanos iliniligtas sa kasakitan, alagad sa maraot minahugpa iyan.

⁹Pwede kang maraot kan tataramon nin bakong diosnon na tawo, alagad an kadonongan kan matanos pwedeng magligtas saimo.

¹⁰Nag-oogma an syudad kun an matanos nagkakaigwa nin marahay na palad, asin nagkakaigwa nin maogmang mga kinurahaw kun nagagadan an maraot.

¹¹Huli sa bendisyon kan matanos magigin dakula an sarong syudad, alagad magagaba iyan huli sa mga tataramon kan maraot.

¹²Mayo nin toltol na kaisipan an tawong nagmemenos sa kapwa; alagad an tawong may pakasabot dai naggigirong.

¹³Mayo nin sekreto na dai ibinubuyagyag kan matabil, alagad maski an sadit na bagay itinatago kan mapapaniwalaan.

¹⁴Marurumpag an sarong nasyon kun mayo nin pagsusundon. An dakul na parahatol nangangahulogan nin katiwasayan.

¹⁵Kun gagarantiyahan mo an utang nin sarong dayuhan, pagbabasolan mo iyan. Mas marahay na dai ka makilabot.

¹⁶Iginagalang an sarong babaeng mabini, alagad an sarong babae na mayong marahay na gawe ikinakasopog. An sarong hugakon na tawo dai nanggad magkakaigwa nin kwarta, alagad an pusoan na tawo magyayaman.

¹⁷An tawong maboot napapakarahay, alagad an makuri nagraraot kan sadiri niyang buhay.

¹⁸Mayong marahay na makukua an maraot na tawo, alagad an nagtatanom nin katanosan magkakamit nin marahay na balos.

¹⁹An tawong nagdadanay sa katanosan mabubuhay, alagad an naglalamag sa karatan magagadan.

²⁰Ikinakauyam nin Kagurangnan an mga tawong may bikong kaisipan, alagad ikinakaogma niya an mga tawong naggigibo nin matanos.

²¹Laomon mo na papadusahan an maraot na tawo, alagad ililigtas an matanos.

²²An gayon kan babaeng mayo nin marahay na isip nakakaarog sa bulawan na singsing sa dungo kan orig.

²³An kamawotan kan matanos minatapos sa karahayan; an paglaom kan maraot minatapos sa kaanggotan.

²⁴May mga tawo na matinao, alagad orog na nagyayaman. An iba maimot nin marahay, alagad orog na nagigin dukha.

²⁵Magmatinao ka, asin mauswag ka. Tabangan mo an iba, asin tatabangan ka man.

²⁶Minamaldisyon kan banwaan an nagtatago kan trigo, alagad inoomaw ninda an nagpapabakal kaiyan.

²⁷Igagalang ka kun marahay an mga katuyohan mo, alagad kun karatan an hinahanap mo, iyan an makukua mo.

²⁸An nananarig sa saiyang kayamanan mararakdag arog sa alang na dahon, alagad mag-uuswag an matanos arog sa berdeng tinanom.

²⁹An tawo na minadara nin problema sa saiyang pamilya maani sana nin doros. An lolong magdadanay na sorogoon kan madodonong.

³⁰Buhay an itinatao kan katanosan, alagad kagadanan an dara kan kadahasan.

³¹An matanos babalosan digdi sa daga, kaya laomon mo na papadusahan an maraot saka an parakasala.