Read Central Bicolano Proverbs 13 Bible Online

Proverbs 13 - Central Bicolano bible

Proverbs 13

¹An madonong na aki naghihinanyog kun sinasagwe siya kan saiyang ama, alagad an mapaabaw-abaw dai minaako na siya nasasala.

²An marahay na tawo babalosan huli sa itinataram niya, alagad an madaya nagmamawot nin kadahasan.

³An maingat magtaram nag-iingat man kan saiyang buhay, alagad an bakong maingat nagraraot kan sadiri niyang buhay.

⁴Maski ano an mawoton kan hugakon, dai niya iyan makakamtan. Nakakamtan kan mahigos an saiyang kamawotan.

⁵Ikinakaongis kan matanos na tawo an kaputikan, alagad makasosopog saka maraot an mga tataramon kan tampalasan.

⁶An matanos na tawo iniingatan kan katanosan, alagad an kasalan iyo an minapabagsak kan tampalasan.

⁷May tawong nagsasagin-sagin na mayaman, alagad mayo nin anoman; dangan may nagsasagin-sagin na dukha, alagad igwa nin dakulang kayamanan.

⁸An kayamanan nin sarong tawo iyo an pantubos kan saiyang buhay, alagad an sarong dukha mayo nin pambayad sa saiyang katalingkasan.

⁹An matanos na tawo garo sarong maliwanag na ilaw, alagad an maraot nakakaarog sa napapalsok na ilawan.

¹⁰An kapaabaw-abawan mayo nin ibubunga kundi iriwal. Sarong kadonongan an paghagad nin hatol.

¹¹Madaling maubos an kayamanan na madali sanang nakamtan, alagad orog na madakul an kayamanan na haloy na pinagpagalan.

¹²Kun nawawara an paglaom naroronot an puso, alagad an kamawotan na naotob nagtatao nin kaogmahan.

¹³An nagsisikwal kan marahay na hatol naghahanap nin karibokan, alagad an nagkukuyog kaiyan nakakalikay sa pag-alaman.

¹⁴An mga katukdoan kan madonong burabod nin buhay para sa tawong boot makalikay sa mga siod nin kagadanan.

¹⁵An kadonongan nakakakua nin paggalang, alagad an tawong dai masasarigan nasa dalan na pasiring sa kapahamakan.

¹⁶Minaisip ngona an madonong bago maghiro, alagad an lolong nagpapahiling kan saiyang kamangmangan.

¹⁷An maraot na sugo iyo an nagigin dahelan nin ribok, alagad an masasarigan na sugo minadara nin katoninongan.

¹⁸An tawo na habong makanood magigin dukha asin mapapasopog, alagad an siisay man na naghihinanyog sa pagsagwe gagalangan.

¹⁹Nakakapagayagaya sa buhay an sarong kamawotan na naootob; alagad an mga lolong naoongis na magtalikod sa karatan.

²⁰Mag-iba ka sa madonong nganing ika magin madonong; kun makipagkatood ka sa lolong mapapahamak ka.

²¹An parakasala linalamag kan kasakitan, alagad an matanos binabalosan nin kauswagan.

²²An marahay na tawo magwawalat nin pamana sa saiyang mga makoapo, alagad an kayamanan kan parakasala mapapasakamot kan matanos.

²³An dagang dai naooma pwedeng magtao nin dakul na kakanon sa dukha, alagad an mga maraot dai minatugot na tanoman iyan.

²⁴Kun dai mo pagpadusahan an saimong aki, dai mo siya namomotan. Kun namomotan mo siya, didisiplinahon mo siya.

²⁵An matanos dai nahahalean nin pagkakan, alagad danay na gutom an tampalasan.