Read Central Bicolano Proverbs 14 Bible Online

Proverbs 14 - Central Bicolano bible

Proverbs 14

¹An madonong na babae nagpapatindog kan saiyang harong, alagad nararaot iyan huli sa kalolongan.

²An naglalakaw sa katanosan natatakot sa Kagurangnan, alagad an may bikong pamumuhay minasikwal saiya.

³An kapaabaw-abawan nin lolong iyo an nakakapataram saiya nin sobra; an tataramon nin madonong iyo an minaingat saiya.

⁴Kun mayo nin baka, mayo nin anihon; huli ta sa kosog kan baka nagkakaigwa nin dakul na ani.

⁵An maimbod na saksi dai nagpuputik, alagad nagsasabi nin kaputikan an bakong totoong saksi.

⁶An mahambog na tawo dai nanggad magigin madonong, alagad an madonong madaling makanood.

⁷Likayan mo an lolong; mayo siya nin ikakatukdo saimo.

⁸Tano ta madonong an may isip na tawo? Huli ta aram niya kun ano an saiyang gigibohon. Tano ta lolong an mangmang na tawo? Huli ta naghohona siya na igwa siya nin naaaraman.

⁹An lolong dai nahahadit kun siya nagkakasala, alagad boot kan marahay na tawo na siya mapatawad.

¹⁰Sadiri mo an saimong kaogmahan; an saimong kapaitan nin boot sadiri mo man. Mayo nin pwedeng makihiras saimo kaiyan.

¹¹Magdadanay na nakatindog an harong kan matanos, alagad magagaba an harong kan tampalasan.

¹²An dalan na sa paghona kan tawo matanos, pwedeng magtapos sa kagadanan.

¹³Pwedeng tahoban nin maogmang lalawogon an kamondoan. Alagad kun tapos na an kaogmahan yaon man giraray iyan.

¹⁴An tawong maraot mag-aani kan maninigo saiya, alagad an marahay na tawo babalosan huli sa saiyang mga gibo.

¹⁵Naniniwala an mangmang sa gabos niyang nadadangog, alagad minamaanan kan madonong an saiyang linalakawan.

¹⁶An Tawong madonong maingat asin minalikay sa karatan, alagad an lolong mayo nin pag-ingat asin mayo nin pagpupugol sa sadiri.

¹⁷An tawong mainit an payo nakakaginibo nin kalolongan; an tawong madonong nagdadanay na toninong.

¹⁸Nakukua kan mangmang an maninigo sa saiyang kalolongan, alagad babalosan nin pakaaram an tawong may toltol na kaisipan.

¹⁹An tawong maraot nagluluhod sa atubangan kan marahay, asin an tampalasan nakikimaherak sa mga trangkahan kan matanos.

²⁰An dukha dai nagugustohan maski kan saiyang kanatad, alagad an mayaman dakul an katood.

²¹Kun boot mong magin maogma, kaherakan mo an dukha; kasalan an pagsikwal sa kiisay man.

²²Bako daw kasalan an pag-isip nin maraot? An nag-iisip nin marahay sinasarigan saka ginagalangan.

²³An gabos na pagpagal igwa nin pakinabang, alagad kadukhaan an aaboton kun gabos sana tataramon.

²⁴An korona kan madonong iyo an saindang kadonongan, alagad an kulintas kan lolong iyo an saindang kalolongan.

²⁵An totoong saksi nagliligtas nin buhay, alagad an parapasaluib nagtataram nin mga kaputikan.

²⁶An pagkatakot sa Kagurangnan minatao nin pagsarig asin katiwasayan sa sarong tawo saka sa saiyang pamilya.

²⁷An pagkatakot sa Kagurangnan sarong burabod nin buhay para sa tawong boot makalikay sa mga siod nin kagadanan.

²⁸An kabantogan kan sarong hade nasa kadakulan kan saiyang nasasakopan; mayo nin halaga an sarong hade kun mayo siyang tawohan.

²⁹An tawong dai tolos naaanggot igwa nin dakulang pakasabot, alagad an madaling maanggot nagpapahiling kan saiyang kalolongan.

³⁰An isip na matoninong minatao nin marahay na hawak, alagad an pag-imon nakakaagid sa helang na kanser.

³¹An nag-aapi sa sarong dukha nagtutuyatuya sa saiyang Kaglalang, alagad an nagtatabang sa dukha nag-oomaw saiya.

³²An tampalasan ibinabagsak kan sadiring karatan, alagad an matanos iniingatan kan sadiring karahayan.

³³An kadonongan nag-eerok sa isip kan tawong may pakasabot, alagad an mga lolong mayo nin naaaraman manongod sa kadonongan.

³⁴An katanosan nagpapadakula sa sarong nasyon, alagad an kasalan nagtatao nin kasosopgan sa arin man na banwaan.

³⁵Nawiwili an sarong hade sa madonong na oripon, alagad minahugpa an saiyang kaanggotan sa sorogoon na minagibong kasosopgan.