Read Central Bicolano Proverbs 17 Bible Online

Proverbs 17 - Central Bicolano bible

Proverbs 17

¹Mas marahay an pagkakan nin matagas na tinapay na igwang katoninongan, ki sa magbangkete sa harong na pano nin kariribokan.

²An tusong sorogoon pwedeng masakop an mayong pakinabang na aki kan saiyang amo asin mahirasan kan pamana bilang saro sa magturugang.

³Binabalo sa kalayo an bulawan saka an plata, alagad an minabalo kan puso nin tawo iyo an Kagurangnan.

⁴An tawong maraot naghihinanyog sa mga kaisipan na maraot, asin an putikon nagdadangog sa kaputikan.

⁵An nagtutuyatuya sa dukha nag-iinsulto sa Dios na naglalang saiya. Papadusahan an nag-oogma sa maraot na palad nin iba.

⁶Ipinag-oorgulyo kan mga lolo an saindang mga makoapo, siring na ipinag-oorgulyo kan mga aking lalaki an saindang mga ama.

⁷An marahay na pagtaram dai makukua sa sarong lolong, ni an kaputikan sa sarong prinsipe.

⁸May mga tawo na naghohona na an pagsuhol garo pagsalamangka; nagtutubod sinda na magigibo kaini an gabos na bagay.

⁹Patawada an tawong nagkasala saimo kun boot mong magustohan ka nin tawo. An paggiromdom sa kasalan iyo an minatapos nin pagkakatood.

¹⁰An sarong pagsagwe orog na minatadom sa sarong madonong ki sa sanggatos na hampak sa sarong lolong.

¹¹An tawong maraot mayo nin hinahanap kundi an pagrebelde, kaya sarong makuring sugo an ipapadara laban saiya.

¹²Marahay pang magsabat sa babaeng oso na inagawan kan saiyang mga ogbon, ki sa sarong lolong sa saiyang kalolongan.

¹³Kun karatan an ibabalos nin sarong tawo sa karahayan, an karatan dai mahahale sa saiyang harong.

¹⁴An pagpoon nin ribok garo pagpabulos nin tubig; kaya ontokon iyan bago magdakula.

¹⁵An minaoyon sa tampalasan asin an minapadusa sa matanos parehong ikinakaongis nin Kagurangnan.

¹⁶Mayong karahayan na makukua an lolong maski maggasto man siya sa pag-aadal, huli ta mayo siya nin isip.

¹⁷An katood namomoot sa gabos na panahon, asin tugang siyang minadamay sa oras nin kasakitan.

¹⁸Lolong sana an minagarantiya sa pagkakautang nin iba.

¹⁹An namomoot sa kasalan namomoot sa pakiiwal, asin an tawong mahambog naghahanap nin kapahamakan.

²⁰An may bikong kaisipan dai minauswag, asin an putikon nahuhulog sa karatan.

²¹An aking mangmang kamondoan nin sarong ama; asin an ama nin sarong lolong mayo nin kaogmahan.

²²An magayagayang puso sarong marahay na bolong, alagad an mamondong espiritu minaubos kan kosog nin tawo.

²³An maraot na hukom hilom na minaako nin suhol, dangan binibiko niya an hustisya.

²⁴An kadonongan iyo an kamawotan kan tawong may pakasabot, alagad dakul an kamawotan kan sarong lolong.

²⁵An aking lolong kamondoan kan saiyang ama, asin kapaitan nin boot kan saiyang ina.

²⁶Bakong marahay an pagpadusa sa matanos, asin bakong tama na paghampakon an mga nobleng tawo.

²⁷Bakong matinaram an tawong may pakaaram. An tawong haloy maanggot igwa nin pakasabot.

²⁸Maski an lolong na nag-aalo ibinibilang na madonong; kun serado an saiyang ngoso hinohona na saro siyang may inadalan.