Read Central Bicolano Proverbs 18 Bible Online

Proverbs 18 - Central Bicolano bible

Proverbs 18

¹An tawong mayo nin iniisip kundi an saiyang sadiri, dai tataong makiiba sa kapwa; asin sasalungaton niya an lambang marahay na kaisipan nin iba.

²Dai nawiwili an lolong sa paghanap nin pakasabot; mas boot niyang mahiling kan ibang tawo na dakul an saiyang naaaraman.

³Kun minaabot an karatan, minaabot man an kasosopgan. Kun nawawara an onra, minasalihid an pag-olog-olog.

⁴An tataramon nin tawo pwedeng paggikanan nin kadonongan, hararom arog kan dagat, malipot arog kan nagbubulos na sapa.

⁵An pagkampi sa tampalasan bakong marahay, siring man an dai pagtao nin hustisya sa tawong matanos.

⁶An mga ngabil kan lolong nagdadara nin iriwal, asin an saiyang ngoso naghahanap nin kulog sa hawak.

⁷An ngimot kan lolong iyo an magdadara saiya sa kapahamakan, siring na an saiyang mga ngabil iyo an mabugtak saiya sa pag-alaman.

⁸An libak garo masiram na kakanon—boot ta nanggad iyan na halonon.

⁹An tawong hugakon tugang kan tawong pararaot.

¹⁰An Kagurangnan arog sa sarong pusog na tore, na pwedeng dumanan kan matanos asin magin ligtas.

¹¹Alagad naghohona an tawong mayaman na an kayamanan niya an mag-iingat saiya, arog kan halangkaw asin makosog na mga kudal sa palibot nin syudad.

¹²Mapalangkaw an tawo kun dai pa naabot an kapahamakan, alagad an dalan pasiring sa kaomawan iyo an kapakumbabaan.

¹³An pagsimbag bago maghinanyog, sarong kamangmangan asin kasosopgan.

¹⁴An pagmawot na mabuhay iyo an magpapakosog sa sarong naghehelang; alagad kun mawara iyan, mawawara man an saiyang huring paglaom.

¹⁵An tawong madonong danay na nagmamawot asin andam na makanood.

¹⁶Boot mong magdolok sa sarong halangkaw na tawo? Magdara ka nin regalo asin magigin pasil an pagdolok saiya.

¹⁷An enot na magtaram sa atubang kan korte hinohona na tama sagkod na dai pa siya hinahapot kan saiyang kalaban.

¹⁸An pagsapalaran iyo an minatapos kan karibokan asin minahusay sa duwang makosog na magkaiwal.

¹⁹Tabangan mo an saimong tugang asin iingatan ka niya arog kan pusog na kudal nin syudad, alagad kun iwalon mo siya, seserahan ka niya nin pintoan.

²⁰Ika an maani kan bunga kan saimong itinataram.

²¹An itinaram mo pwedeng magligtas o magraot nin buhay; kaya dapat mong kakanon an mga bunga kan saimong mga tataramon.

²²An pakaagom nin marahay na babae sarong kaogmahan; nagpapahiling iyan na nawiwilihan ka nin Kagurangnan.

²³An dukha magalang kun makiolay, alagad mayong galang kun magsimbag an mayaman.

²⁴May pagkakatood na dai naghahaloy, alagad may katood na labi pa sa tugang.