Read Central Bicolano Proverbs 23 Bible Online

Proverbs 23 - Central Bicolano bible

Proverbs 23

¹Kun magtukaw ka sa pagkakan kaiba an sarong dakulang tawo, hare paglingawe kun siisay an saimong kahampang.

²Kun paslo ka, pugolan mo an saimong sadiri.

³Dai ka magpakapaslo sa masiram na kakanon na inandam niya, huli ta tibaad boot ka sana niyang dayaon.

⁴Dai mo paggadanon an saimong sadiri sa pagpayaman; magin madonong ka tanganing malikayan mo iyan.

⁵Pwedeng bigla sanang mawara an saimong kwarta, na garo nagkaigwa ini nin mga pakpak saka luminayog paharayo arog kan agila.

⁶Dai ka makikakan sa tawong kuripot, o magmawot kan inandam niyang masiram na kakanon.

⁷Aalokon ka niyang magkakan, alagad bako iyan tudok sa boot niya. Kun ano siya iyo man an nasa saiyang isip.

⁸Isusuka mo an saimong kinakan, asin masasayang an magagayon mong tataramon.

⁹Dai ka makipag-olay sa lolong manongod sa kadonongan; dai niya iyan masasabotan.

¹⁰Dai mo nanggad paghiroon an suanoy na muhon na haloy nang ibinugtak, o pagsakopon an daga kan mga ilo.

¹¹An Kagurangnan iyo an saindang makosog na parasurog, asin siya an malaban kan saindang kaso laban saimo.

¹²Pagdangog sa saimong paratukdo saka pag-adal nin marahay.

¹³Dai ka magduwa-duwa sa pagdisiplina nin aki. An tamang paghampak dai niya ikakagadan;

¹⁴sa katunayan, pwedeng iyan an magligtas kan saiyang buhay.

¹⁵Aki ko, maoogma ako kun ika magigin madonong.

¹⁶Mag-oorgulyo ako kun madangog ko na nagtataram ka nin mga tataramon na may kadonongan.

¹⁷Dai ka maori sa mga parakasala, kundi matakot ka sa Kagurangnan sagkod na ika nabubuhay.

¹⁸Kun gibohon mo iyan, may paglalaomon ka sa huring mga aldaw.

¹⁹Paghinanyog, aki ko. Magin madonong ka asin isipon mo nin marahay an saimong pamumuhay.

²⁰Dai ka makiiba sa mga paraburat asin sa mga paslo.

²¹Huli ta an paraburat saka an paslo nagigin dukha, asin an nagpaparakatorog maggugubing nin trapo.

²²Hinanyoga an saimong ama na nagtao saimo nin buhay, asin dai mo pagbasang-basangon an saimong ina sa saiyang paggurang.

²³Bakong sayang maski bakalon mo an katotoohan, kadonongan, katukdoan saka pakasabot, alagad mahalaga ini nin marahay kaya dai dapat ipabakal.

²⁴An ama nin matanos na tawo mapapano nin kaogmahan. Pwedeng ipag-orgulyo nin sarong ama an aking madonong.

²⁵Gibohang ipag-orgulyo ka kan saimong mga magurang; tawan sa saimong ina an kaogmahan na iyan.

²⁶Aki ko, paghinanyog nin marahay, asin gibohon mong arogan an sakong buhay.

²⁷An maraot na babae garo litag na nakakagadan.

²⁸Naghahalat siya arog sa mga mahabon, asin siya an dahelan kun tadaw ta kadakul na lalaki an bakong maimbod sa saindang agom.

²⁹Siisay an may kamondoan asin an may pagbasol? Siisay an may kaiwal saka an may kahaditan? Siisay an may mga matang namumula?

³⁰Siya an tawong paraburat, an tawong nagpaparaburat sa manlaen-laen na arak.

³¹Dai ka magpadagka sa arak maski iyan mamahalon, nagkikinang sa baso, saka masiram an namit.

³²Huli ta pagkaaga mamamatean mong garo ka kinagat nin mararang halas.

³³May mahihiling kang mga bagay na makangangalas asin dai ka makapag-isip nin marahay, ni makakataram nin malinaw.

³⁴Mamatean mo na garo ka nasa tahaw kan dagat, nalulula, nagtatabyon sa itaas kan palo kan layag.

³⁵Masabi ka, “Garo akong binaradulan, alagad dai ko nagigiromdoman. Tadaw ta dai ako nagigimata? Kaipuhan mag-inom giraray ako.”