Read Central Bicolano Proverbs 25 Bible Online

Proverbs 25 - Central Bicolano bible

Proverbs 25

¹Uya an iba pang mga talinhaga ni Solomon, na kinopya kan mga tawohan ni Ezekias na hade nin Juda.

²An kamurawayan nin Dios yaon sa pagtago nin mga bagay, alagad an kamurawayan nin mga hade yaon sa pagsiyasat kaiyan.

³An kaisipan nin sarong hade masakit na marorop, huli ta arog iyan kahalangkaw kan langit asin arog kahararom kan dagat.

⁴Halea an mga ati sa plata, asin may magigibo nang magayon na kagamitan an panday.

⁵Halea sa hade an maraot na mga parahatol, asin magdadanay sa kahadean an hustisya.

⁶Dai ka maghambog sa atubangan kan hade, ni magsagin-sagin na saro kang dakulang tawo.

⁷Mas marahay pang sabihan ka niya, “Digdi ka sa itaas,” ki sa sopogon ka sa atubang nin mga prinsipe.

⁸Dai ka magmadali sa pagdara sa hukoman kan ano man na nahiling mo. Huli ta kun may magpatotoo na nasasala ka, ano an saimong gigibohon?

⁹Kun ika asin an saimong kanatad igwa nin dai pagkasinabotan, pag-olayan ngona nindo iyan, saka dai mo ipagluwas an anoman na sekreto.

¹⁰Huli ta kun dai, maaaraman kan gabos na dai ka tataong magtago nin sekreto, asin dai mahahale an saimong kasosopgan.

¹¹Tampok na bulawan sa alahas na plata an kabaing kan tataramon na isinabi sa tamang panahon.

¹²An patanid nin madonong sa tataong magdangog orog na mahalaga ki sa bulawan na singsing o alahas na gibo sa pinakapinong bulawan.

¹³An maimbod na sugo kaginhawahan kan nagsugo, arog kan malipot na tubig sa panahon nin tig-init.

¹⁴Garo man sana panganoron saka doros na mayo nin darang uran an tawong nanunuga nin regalo na dai man itinatao.

¹⁵An marahay na pakiolay nakakapalumoy sa matagas na puso, asin nakakakombenser maski sa hade.

¹⁶Dai ka magpangana sa pag-inom nin dugos huli ta kun masobrahan ka, isusuka mo iyan.

¹⁷Dai mo pag-aroaldawon an pagdalaw sa saimong kanatad huli ta tibaad mauyam siya saimo.

¹⁸Garo espada, pamukpok, saka bosog na matarom an tawong nagsasaksi nin kaputikan laban sa saiyang kapwa.

¹⁹Garo ngipon na naggigilo-gilo o bitis na pilay an parapasaluib na sinasarigan sa panahon nin kahaditan.

²⁰An pag-awit sa tawong may kamondoan garo man sana paghuba saiya kun tiglipot, o garo pagbugtak nin asin sa lugad niya.

²¹Kun nagugutom an saimong kaiwal, pakakana siya; kun siya napapaha painoma siya.

²²Sa siring na paagi mapapasopog siya, asin babalosan ka kan Kagurangnan.

²³Kun paano nagdadara nin uran an amihan na doros, nagdadara man nin kaanggotan an paglibak.

²⁴Marahay pang mag-erok sa atop kan harong ki sa mag-erok sa laog kaiyan sa kaibahan nin maribok na babae.

²⁵Arog sa malipot na tubig sa napapahang kalag an marahay na bareta hale sa harayong lugar.

²⁶Malaboy na burabod o maating bubon an kabaing kan matanos na tawo na nagpapahunod sa tawong maraot.

²⁷An pag-inom nin dakul na dugos bakong marahay, siring man an paghanap nin sobrang kaomawan.

²⁸An tawo na dai tataong magpugol sa sadiri garo syudad na sinalakay nin kaiwal saka binayaan na mayo nin kudal.