Read Central Bicolano Proverbs 26 Bible Online

Proverbs 26 - Central Bicolano bible

Proverbs 26

¹An kaomawan bakong angay sa sarong lolong, arog kan nyebe sa tig-init o kan uran sa panahon nin tig-ani.

²An mga maldisyon na bakong maninigo dai nagkakatotoo. Arog iyan sa gamgam na naglalayog asin dai nanggad minatugdon.

³An latigo para sa kabayo, an busal para sa asno, asin an pamakol para sa lolong na tawo.

⁴Dai ka magsimbag sa lolong sosog sa saiyang kalolongan ta tibaad magin siring ka man saiya.

⁵Simbagon mo an lolong sosog sa saiyang kalolongan, asin maiisip niyang bako siyang madonong arog kan paghona niya.

⁶Kun lolong man sana an papadarahon mo kan saimong mensahe, mas marahay pang putolon mo na sana an saimong mga bitis; karibokan an saimong hinahanap.

⁷Kun paanong an mga bitis na pilay mayo nin pakinabang, siring man an talinhaga sa ngoso kan lolong.

⁸An pag-omaw sa lolong arog sa paggakod kan gapo sa lagpitaw.

⁹An talinhaga sa ngoso kan lolong garo tonok na nakakatusok sa kamot kan paraburat.

¹⁰An minatandan sa arin man na minaaging lolong garo parapana na nakakalugad sa kiisay man.

¹¹An lolong na minagibo liwat kan parehong kalolongan garo man sana ayam na minabalik sa saiyang isinuka.

¹²Igwa pa nin paglaom an sarong lolong ki sa tawong naghohona na siya madonong.

¹³Nagsasabi an hugakon, “May leon sa dalan! May leon sa mga tinampo!”

¹⁴Siring na an pinto naghihiro sa saiyang bisagra, siring man kaiyan an hugakon sa saiyang higdaan.

¹⁵Mapagal sa hugakon maski an paghungit kan saiyang kakanon.

¹⁶An paghona kan hugakon mas madonong siya ki sa pitong tawo na tataong magsimbag.

¹⁷Arog sa tawong minatakma na sana kan talinga kan arin man na minaaging ayam an tawong nakikiaram sa problema nin iba.

¹⁸An tawong nandadaya dangan minasabing nagsusuba sana siya, nakakaarog sa bua-bua na nagkakawat nin armas na nakakagadan.

²⁰Nagagadan an kalayo kun mayo nin igatong; naoontok an iriwal kun mayo nin parasotsot.

²¹Nagdadanay na malaad an baga kun igwa nin oring, an kalayo kun igwa nin igatong, siring man an diriskutiran kun igwa nin nagpaparibok.

²²An libak garo masiram na kakanon—boot ta nanggad iyan na halonon!

²³An magayon na pagtaram na nagtatahob nin madayang puso garo makintab na pintura sa baratong tapayan.

²⁴An pagkaongis itinatago kan parasagin-sagin sa likod nin magagayon na tataramon.

²⁵Marahay iyan pagdangogon alagad dai ka magtubod saiya, huli ta an puso niya pano nin kaanggotan.

²⁶Pwede niyang matahoban an saiyang kaanggotan, alagad mahihiling kan gabos an maraot niyang mga gibo.

²⁷An nagbubugtak nin siod para sa iba iyo man sana an madadakop kaiyan. An nagpapaligid nin gapo iyo man sana an matatamaan kaiyan.

²⁸An putikon na dila nakakapahamak kan mayo nin sala, asin an madayang tataramon nakakaraot sa kapwa.