Read Central Bicolano Proverbs 27 Bible Online

Proverbs 27 - Central Bicolano bible

Proverbs 27

¹Dai mo ipaghambog an noodma, huli ta dai mo aram kun ano an mangyayari sa aldaw na iyan.

²Pabayaan mong iba an mag-omaw saimo; dai mo nanggad paggibohon iyan sa saimong sadiri.

³Magabat an gapo, asin may timbang an baybay, alagad an problemang bunga nin kalolongan mas magabat sa duwang iyan.

⁴Makuri saka nakakatakot an kaanggotan, alagad siisay an makakatagal sa pag-imon?

⁵Mas marahay an hayag na pagsagwe ki sa natatagong pagkamoot.

⁶May karahayan an hampak nin maimbod na katood ki sa hadok nin kaiwal.

⁷Kun basog an sarong tawo, hinahaboan niya an dugos, alagad kun nagugutom siya maski mapait na kakanon mahamis sa pagnamit niya.

⁸An tawong harayo sa saiyang harong arog sa gamgam na harayo sa saiyang salagan.

⁹An lana asin an pahamot nagpapaogma sa puso, alagad an kahandalan nagpapagabat sa isip.

¹⁰Dai mo paglingawan an saimong mga katood, ni an mga katood kan saimong ama. Kun igwa ka nin problema, dai ka magpatabang sa saimong tugang. Orog na matatabangan ka kan katood na nasa harani ki sa tugang na nasa harayo.

¹¹Magin madonong ka, aki ko, tanganing mag-ogma an sakong puso asin magkaigwa ako nin isisimbag sa mag-oolog-olog sako.

¹²Minatago an madonong kun may nahihiling na pag-alaman, alagad dai minalikay an mangmang asin pinagdudusahan niya iyan.

¹³An tawong nanunuga para sa utang nin iba dapat na kuahan nin rogaring bilang garantiya.

¹⁴Mas marahay pang maldisyonon mo an saimong katood ki sa pukawon mo siya pagkaaga sa paagi nin makosog na pangongomusta.

¹⁵An maribok na babae garo uran na dai naghuhuraw.

¹⁶An pagpaontok saiya garo pagpaontok sa doros o pagpugol sa lana.

¹⁷Lansang an minapatarom sa lansang, asin tawo an minapatarom sa isip kan kapwa niya tawo.

¹⁸An nag-aataman nin higera magkakakan kan bunga kaiyan, asin an oripon na nagbabantay kan saiyang kagurangnan oomawon.

¹⁹Sadiri mong lalawogon an mahihiling mong nalaladawan sa tubig asin an tunay mong pagkatawo an mahihiling mo sa saimong puso.

²⁰An kinaban kan mga gadan dai nanggad nakokontento; siring man kaiyan an mga kamawotan nin tawo.

²¹An bulawan saka an plata binabalo sa kalayo; an tawo hinuhukoman huli kan saiyang dangog.

²²Maski pa bayohon sa lubang an lolong na garo trigo, dai nanggad mahahale an saiyang kalolongan.

²³Atamana nin marahay an saimong mga karnero asin mga baka,

²⁴huli ta an kayamanan dai nagdadanay. Maski an mga nasyon igwa nin kataposan.

²⁵Putola an mga dagami saka mga doot sa kabubuldan mantang nagtatalubo an dagaming sunod na puputolon.

²⁶Makakagibo ka nin gubing hale sa balukag kan saimong mga karnero asin makakabakal ka nin daga hale sa kwartang kabaklan kan nagkapira mong kanding.

²⁷Magkakaigwa ka asin an saimong pamilya saka mga sorogoon nin dakul na gatas hale sa natatadang mga kanding.