Read Central Bicolano Proverbs 31 Bible Online

Proverbs 31 - Central Bicolano bible

Proverbs 31

¹Iyo ini an mga itinukdo ki Hadeng Lemuel kan saiyang ina:

²“Ika an sakong namomotan na aki, an kasimbagan sa sakong mga pamibi. Ano an sasabihon ko saimo?

³Dai mo pagsayangon an saimong kosog sa mga babae asin an saimong kwarta sa sainda; ipapahamak ninda an hade.

⁴Lemuel, an mga hade dai dapat na mag-inom nin arak, ni magmawot nin makosog na inomon.

⁵Kun sinda nabuburat, nalilingawan ninda an katogonan asin napapabayaan an deretso kan mga mayong sukat.

⁶Itao mo an arak sa mga naghihingagdan asin sa mga nasasakitan.

⁷Pabayae sindang mag-inom asin malingawan an saindang kadukhaan saka kamondoan.

⁸“Magpahayag ka para sa mga tawo na dai nakakapahayag kan saindang sadiri. Ipakilaban mo an deretso kan gabos na dai kayang makilaban.

⁹Magpahayag ka para sainda asin magin saro kang matanos na hukom. Ipakilaban mo an deretso kan dukha asin kan mayong sukat.”

¹⁰Masakit an paghanap nin marahay na agom na babae? Mas mahalaga siya ki sa mga alahas.

¹¹May pagsarig saiya an saiyang agom asin dai ini magkukulang nin kakanon.

¹²Mantang siya nabubuhay, gabos karahayan an itinatao niya sa saiyang agom asin bakong karatan.

¹³Mahigos siyang maggibo nin mga gubing na lana saka lino.

¹⁴Arog kan barkong pangnegosyo, nagdadara siya sa saiyang harong nin mga kakanon na hale sa hararayong lugar.

¹⁵Bago magsirang an aldaw minabangon na siya tanganing andamon an kakanon kan saiyang pamilya, asin tanganing taraman an saiyang mga sorogoon na babae kan dapat nindang gibohon.

¹⁶Maingat niyang hinihiling an sarong oma bago binabakal iyan. Dangan minapagibo siya nin ubasan hale sa kwartang saiyang natipon.

¹⁷Siya maigot sa pagtrabaho, makosog, saka mahigos.

¹⁸Naaaraman niya an halaga kan lambang ginigibo niya, asin maski matanga na an banggi nagtatrabaho pa siya.

¹⁹Naggigibo siya nin torsido saka naghahabol nin sadiring gubing.

²⁰Matinao siya sa dukha saka sa mayong sukat.

²¹Dai siya nahahadit kun tiglipot huli ta an saiyang pamilya igwa nin mahimbong na gubing.

²²Naggigibo siya nin mga kubrekama asin nagsusulot siya nin gubing na pinong purpurang lana.

²³An saiyang agom minimidbid kan banwaan asin saro siya sa mga ginagalangan na tawo.

²⁴Naggigibo siya nin mga gubing saka mga habay, dangan ipinapabakal iyan sa mga negosyante.

²⁵Makosog siya saka ginagalangan; dai siya natatakot kan maabot na aldaw.

²⁶Nagtataram siya na may mahuyong kadonongan.

²⁷Dai siya nag-oontok sa pagtrabaho aroaldaw asin minamangno niya an mga pangangaipo kan saiyang pamilya.

²⁸Ginagalangan siya kan saiyang mga aki, asin inoomaw kan saiyang agom.

²⁹Minasabi an saiyang agom, “Kadakul na babae an marahay na agom, alagad ika an nangongorog sainda.”

³⁰Madaya an karinyo asin nawawara an gayon, alagad an babae na may pagkatakot sa Kagurangnan dapat na omawon.

³¹Tawan mo siya nin kaomawan huli kan saiyang mga ginibohan. Maninigong galangan siya kan lambang saro.