Read Central Bicolano Proverbs 4 Bible Online

Proverbs 4 - Central Bicolano bible

Proverbs 4

¹Hinanyoga nindo, mga aki, an katukdoan kan saindong ama. Danay na maghinanyog kamo sainda tanganing magtalubo kamo sa pakasabot.

²An itinutukdo ko saindo marahay, kaya giromdoma nindo ini gabos.

³Bugtong na aking lalaki ako kan sakong mga magurang, asin kan ako aki pa,

⁴tinukdoan ako kan sakong ama. An sabi niya, “Magdanay logod sa saimong puso an sakong mga tataramon; kuyoga an sakong mga togon, asin mabubuhay ka.

⁵Dai mo paglingawan o pagtalikodan an sakong mga tataramon. Hanapon mo an kadonongan asin an pakaaram.

⁶Dai mo pagpabayaan an kadonongan asin iingatan ka niya; kamotan mo siya, asin babantayan ka niya.

⁷An pakakua nin kadonongan iyo an pinakamahalaga. Maski ano pa an makua mo, pakaaram an saimong kuahon.

⁸Pahalagahan mo an kadonongan asin ilalangkaw ka niya; tatawan ka niya nin kaomawan kun kugoson mo siya.

⁹Samno nin kamurawayan an ibubugtak niya sa saimong payo; magayon na korona an itatao niya saimo.”

¹⁰Magdangog ka, aki ko, asin akoa an sakong mga tataramon, tanganing mabuhay ka sa halawig na panahon.

¹¹Tinukdoan taka kan dalan nin kadonongan; pinangenotan taka sa mga agihan nin katanosan.

¹²Kun ika maglakaw, dai oolangon an saimong lakad; kun ika magdalagan, dai ka matutumba.

¹³Pugolan mo an katukdoan, asin dai mo pagbutasan; bantayan mo siya, huli ta siya an saimong buhay.

¹⁴Dai ka maglakaw sa dalan kan tampalasan, ni magtungtong sa inaagihan kan mga maraot na tawo.

¹⁵Likayan mo iyan! Dai ka mag-agi diyan! Magliklik ka asin magpadagos ka sa saimong paglakaw.

¹⁶Huli ta an mga tampalasan dai nangangatorog kun dai nakakagibo nin maraot, asin kun mayo sinda nin nakukulogan.

¹⁷Huli ta kinakakan ninda an tinapay nin karatan asin ininom an arak nin kadahasan.

¹⁸Alagad an dalan kan matanos arog kan liwanag nin kaagahon, na minaorog mantang nag-iitaas an aldaw.

¹⁹An dalan kan mga tampalasan madiklom siring sa banggi. Natutumba sinda alagad dai ninda nahihiling kun ano an saindang nasingkogan.

²⁰Aki ko, himatea nin marahay an sakong itinataram. Dangoga an sakong mga tataramon.

²¹Dai mo pagpabayaan na mawara ini saimo; saraya ini sa saimong puso.

²²Ini an nagtataong buhay asin marahay na hawak sa kiisay man na nakakasabot kaini.

²³Ingatan mo an saimong kaisipan, huli ta minabulos hale diyan an mga burabod nin buhay.

²⁴Halea sa ngoso mo an kaputikan; likayan mo an madayang tataramon.

²⁵Ituruhok mo an saimong mga mata sa enotan; tanawa an saimong padudumanan.

²⁶Isipa nin marahay an anoman na gigibohon mo, asin magigin magayon an bunga kaiyan.

²⁷Likayan mo an karatan asin magpadagos ka sa matanos na paglakaw. Dai ka magliko sa wala o sa too.