Read Central Bicolano Proverbs 5 Bible Online

Proverbs 5 - Central Bicolano bible

Proverbs 5

¹Aki ko, himatea nin marahay an sakong kadonongan asin dangoga an sakong pakasabot,

²tanganing maaraman mo an tamang gawe, asin mahayag na ika igwa nin pakaaram sa saimong mga tataramon.

³Huli ta maski nagtatagdo nin dugos an mga ngabil kan agom nin ibang lalaki, asin mas mahalnas pa ki sa lana an saiyang dila,

⁴alagad sa kataposan, mapait siya arog sa apdo, matarom arog sa espadang duwa an tarom.

⁵An saiyang mga bitis minapasiring sa kagadanan; an saiyang mga lakad minapasiring sa kinaban kan mga gadan.

⁶Dai niya sinisiyasat an dalan pasiring sa buhay; nalalagalag siya, alagad dai niya iyan naaaraman.

⁷Kaya ngunyan, mga aki ko, maghinanyog kamo sako, asin dai nindo paglingawan an sakong mga tataramon.

⁸Maglikay kamo sa siring na babae! Dai kamo magrani maski sa pintoan kan saiyang harong!

⁹Huli ta kun gibohon nindo iyan, mawawaraan kamo nin onra asin iyan mapapaduman sa iba; hoben pa kamong magagadan sa kamot kan mga mayong herak na tawo.

¹⁰An kayamanan nindo uuboson kan mga dayuhan; an pinagalan nindo, iba an makinabang.

¹¹Matatapos an saindong buhay sa pag-agrangay; matutunaw an saindong laman asin hawak.

¹²Masabi kamo, “Tadaw ta ikinaongis ko an saindang mga hatol? Tadaw ta isinikwal ko an saindang mga pagsagwe?

¹³Dai ko dinangog an tingog kan sakong mga paratukdo, ni tinawan nin halaga an saindang katukdoan.

¹⁴Ngunyan naaraman kong mayo ako nin onra sa atubang nin mga tawo.”

¹⁵Magin maimbod ka sa sadiri mong agom; siya sana an tawan mo kan saimong pagkamoot.

¹⁶Mayo nin ikakataong karahayan saimo an mga aki sa bako mong tunay na agom.

¹⁷An saimong mga aki dapat na magdarakula tanganing tabangan ka asin bakong an mga dayuhan.

¹⁸Kaya makontento ka sa saimong agom, asin hanapon mo an saimong kaogmahan sa babaeng saimong inagom.

¹⁹Saro siyang magayon saka mabining babae. Danay na ikaogma mo an saiyang kabinian; mapano ka kan saiyang pagkamoot.

²⁰Aki ko, tadaw ta itatao mo an saimong pagkamoot sa ibang babae? Tadaw ta orog na papahalagahan mo an karinyo kan agom nin ibang lalaki?

²¹Nahihiling nin Dios an gabos mong gibo. Saen ka man magduman namamasdan ka niya.

²²Sarong siod an mga kasalan kan tampalasan, asin nadadakop siya sa hikot kan sadiri niyang kasalan.

²³Nagagadan siya huli ta mayo siya nin pakapugol sa sadiri. An dakula niyang kalolongan iyo an madara saiya sa sadiri niyang lulubngan.