Read Central Bicolano Proverbs 7 Bible Online

Proverbs 7 - Central Bicolano bible

Proverbs 7

¹Aki ko, giromdoma an sakong mga sinasabi, asin dai mo nanggad paglingawan an ipinapagibo ko saimo.

²Otoba an sakong mga pagboot asin mabubuhay ka. An sakong katukdoan ingatan mo arog kan pag-ingat mo sa saimong mga mata.

³Ibugkos mo iyan sa saimong mga muro asin isurat mo sa saimong puso.

⁴Sabihan mo an kadonongan, “Tugang takang babae,” asin an pakasabot apodon mong namomotan na katood.

⁵Ililikay ka ninda sa babaeng may agom, sa babaeng may mahahamis na mga tataramon.

⁶Nagdudungaw ako kaidto sa bintana kan sakong harong,

⁷asin nahiling ko an dakul na mayong eksperyensyang mga hoben na lalaki, alagad may namasdan akong sarong lolong na hoben.

⁸Naglalakaw siya sa tinampo, harani sa kantong ineerokan nin sarong babae,

⁹sa kadikloman nin banggi.

¹⁰Dangan sinabat siya kan babae; nakagubing ini nin sa maraot na babae, asin katusohan an nasa puso kaini.

¹¹Makosog an saiyang boot asin mayo nin sopog. Danay siyang nasa mga tinampo

¹²o nagtitindog sa sarong kanto, kun minsan sa mga tinampo, kun minsan sa saodan.

¹³Pinugol kan babae an hoben asin hinadokan, dangan daing sopog na nagsabi,

¹⁴“Nagdolot ako nin mga atang ngunyan na aldaw, asin igwa ako kan karneng hale sa mga sakripisyo.

¹⁵Kaya nagluwas ako tanganing hanapon ka, asin ngunyan nanumpongan taka!

¹⁶Hinapinan ko an sakong higdaan nin linong hale sa Egipto na manlaen-laen an kolor.

¹⁷An sakong higdaan winisikan ko nin pahamot na mira, aloe, asin kanela.

¹⁸Madya, lunodon ta an satong sadiri sa kaogmahan; uboson ta an bilog na banggi sa pagkamoot.

¹⁹Mayo sa harong an sakong agom. Naghale siya asin harayo an lugar na saiyang dudumanan.

²⁰Nagdara siya nin dakul na kwarta; mapuli siya pakalihis nin duwang semana.”

²¹Huli kan mga tataramon na nandadagka, nagsuko an hoben.

²²Nagsunod tolos siya sa babae arog sa bakang bubunoon, arog sa usa na naglulukso pasiring sa litag,

²³saen malagbas sa saiyang puso an sarong bosog. Arog siya sa sarong gamgam na naglalaog sa sarong hikot; dai niya naaaraman na nasa pag-alaman an saiyang buhay.

²⁴Kaya ngunyan, mga aki ko, hinanyoga nindo ako. Himatea nindo nin marahay an mga tataramon ko.

²⁵An saindong puso dai nindo pagtugotan na madagka kan siring na babae; dai kamo maglagalag pasiring sa saiyang harong.

²⁶Huli ta kadakul nang lalaki an rinaot niya, asin dai na mabilang an nagkagaradan huli saiya.

²⁷Kun magduman ka sa saiyang harong, nasa dalan na kamo pasiring sa kinaban kan mga gadan. Iyo iyan an halipot na agihan pasiring sa kagadanan.