Read Central Bicolano Ecclesiastes 1 Bible Online

Ecclesiastes 1 - Central Bicolano bible

Ecclesiastes 1

¹Iyo ini an mga tataramon kan Parahulit, na aking lalaki ni David na hade sa Jerusalem.

²Mayong halaga an buhay, an sabi kan Parahulit. Mayo nin halaga an gabos na bagay. An buhay mayo nin halaga! Mayo nin halaga an gabos.

³Ano an napapakinabang nin tawo sa gabos niyang ginigibo sa kinaban?

⁴Minaagi an sarong henerasyon, asin minadatong an saro pa, alagad an kinaban nagdadanay sagkod lamang.

⁵An aldaw minasirang dangan minasolnop, asin hidaling minabalik sa lugar na sinisirangan kaiyan.

⁶An doros minahuyop pasiring sa habagat, asin minalibot pasiring sa amihan; pabalik-balik sana an doros.

⁷An gabos na salog minabulos pasiring sa dagat, alagad dai ini napapano. An tubig minabalik sa mga salog, tanganing padagos naman na magbulos.

⁸An gabos na bagay pano nin kapagalan; anoman an itaram nin tawo dai iyan nanggad ikapaliwanag. An mata dai nakokontento sa paghiling; siring man an talinga sa pagdangog.

⁹An nangyari kaidto, mangyayari giraray, asin an ginibo kaidto, gigibohon giraray. Mayo nin anoman na bago sa kinaban.

¹⁰Igwa nin masabing, “Hilinga, bago ini!” Alagad bako, huli ta haloy nang nangyari iyan bago pa kita namundag.

¹¹Mayo nin nakakagiromdom kan mga nangyari na, asin an mga mangyayari poon ngunyan dai man magigiromdoman ngapit.

¹²Ako, an Parahulit, nagin hade nin Israel sa Jerusalem.

¹³Hiningowa kong siyasaton asin adalan an gabos na bagay na ginigibo sa kinaban na ini. Mamondong palad an itinao nin Dios sa sato.

¹⁴Nahiling ko na an gabos na ginibo sa kinaban na ini, asin sinasabihan ko kamo; an gabos mayo nin halaga; garo saro sana iyan na paglamag sa doros.

¹⁵Dai man napapatanos an tiko, asin an mayo dai man nabibilang.

¹⁶Nagsaboot ako, “Nakamtan ko an dakulang kadonongan, orog ki sa gabos na naenot sako na naghade sa Jerusalem. Aram ko kun ano mananggad an kadonongan asin an pakaaram.”

¹⁷Hiningowa kong saboton an kalaenan kan pakaaram asin kalolongan, kan kadonongan saka karungawan. Alagad nahiling ko na arog man giraray ini sa paglamag sa doros.

¹⁸Kun mas madonong ka, mas dakul man an saimong kahaditan; kun mas dakul an saimong naaaraman, mas dakul man an saimong kamondoan.