Read Central Bicolano Ecclesiastes 12 Bible Online

Ecclesiastes 12 - Central Bicolano bible

Ecclesiastes 12

¹Kaya giromdoma nindo an saindong Kaglalang mantang hoben pa kamo, bago umabot an mga maraot na aldaw saka mga taon na masabi kamo, “Dai na ako naoogma sa buhay.”

²Sa panahon na iyan, an liwanag kan aldaw, kan bulan, saka kan mga bitoon magigin kadikloman para saindo, asin an mga maitom na panganoron dai mapapara.

³Dangan tatakigan an saindong mga takyag, na iyo an nag-ingat saindo; an saimong mga bitis na dating makokosog, magigin maluya. Magdidikit an saindong mga ngipon na pansapa nindo nin kakanon, asin an mga mata nindo madiklom saka dai makakamaan nin marahay.

⁴An saindong mga talinga magigin bongog sa ribok sa tinampo. Dai nindo madadangog nin marahay an tanog kan gilingan o an tono nin sarong awit; alagad magigimata kamo sa saindong pagkatorog maski huli kan awit nin sarong gamgam.

⁵Matatakot kamo sa halangkaw na mga lugar, asin magigin makatatakot saindo an paglakaw. Magigin puti an saindong buhok asin magigin dipisil saindo maski an paghiro-hiro; dangan mawawara an gabos nindong pagmawot. Kita gabos maduman sa huring lugar na pahingaloan, dangan malibot sa mga tinampo an mga paramondo.

⁶Mapapatod an platang kadena, asin mahuhulog saka mapapasa an bulawan na ilawan; an pitsel nin tubig mapapasa asin an pisi sa bubon mapapatod.

⁷An satong hawak mabalik sa alpog kan daga, asin an hinangos nin buhay mabalik sa Dios, na iyo an nagtao kaiyan sato.

⁸Mayo nin halaga, an sabi kan Parahulit. An gabos mayo nin halaga.

⁹Nin huli ta madonong an Parahulit, padagos niyang tinukdoan an mga tawo kan naaaraman niya. Nag-adal siya nin mga talinhaga asin binalo niya nin marahay an katotoohan kan mga iyan.

¹⁰An Parahulit naghingowang makakua nin nakakarangang mga tataramon asin an sinurat niya gabos katotoohan.

¹¹An mga kasabihan nin mga madonong kabaing sa mga mapanas na sugkod na ginagamit kan mga pastor sa pag-alaw kan karnero, asin an mga tiniripon na talinhaga magdadanay arog sa mga pako na nakatadom nin marahay. Ini gabos itinao nin Dios, an iyo-iyong Pastor nyato gabos.

¹²Aki ko, igwa ka pang dapat na masabotan. Mayo nin kataposan an pagsurat nin mga libro, asin an sobrang pag-aadal nagdadara nin kapagalan sa hawak.

¹³Pakatapos kaini, saro na sana an dapat itaram: Matakot ka sa Dios, asin otobon mo an saiyang mga togon, huli ta iyo iyan an katongdan nin tawo.

¹⁴Huhukoman nin Dios an gabos nyatong gibo, marahay man o maraot, maski an mga bagay na ginibo sa hilom.