Read Central Bicolano Ecclesiastes 2 Bible Online

Ecclesiastes 2 - Central Bicolano bible

Ecclesiastes 2

¹Hiningowa kong paogmahon an sakong sadiri asin aramon kun ano an kaogmahan, alagad namidbid ko na ini mayo man nin halaga.

²Nasabotan ko na an pagngisi sarong kalolongan, asin an kaogmahan mayo man nin itinataong karahayan.

³Sa maigot kong pagmawot na makamtan an kadonongan, nag-isip akong paogmahon an sakong hawak sa paagi nin arak asin nin kalolongan. Nagsaboot ako na tibaad iyo ini an pinakamarahay na paagi sa paggamit nin tawo kan halipot niyang buhay sa daga.

⁴Dakulang mga bagay an nagibo ko. Nagtugdok ako para sako nin mga harong asin nagtanom nin mga ubas.

⁵Nagpagibo ako nin tatamnan saka mga plasa na igwa nin tanom na manlaen-laen na kahoy na nagbubunga.

⁶Naggibo ako nin mga patubig tanganing magtao nin tubig sa nagtatalubong mga kahoy.

⁷Nagbakal ako nin mga oripon na lalaki saka babae, asin igwa nin mga oripon na namundag sa laog kan sakong harong. Nasadirihan ko an dakul na hayop, na mas dakul ki sa mga pagsadiri kan mga naenot sa sakong naghade sa Jerusalem.

⁸Nagkaigwa man ako nin dakul na plata saka bulawan hale sa mga probinsya na pinaghadean ko. Mga lalaki saka mga babae an nag-awit sa pagpaogma sako; nagkaigwa man ako nin dakul na babae na mawiwilihan nanggad nin siisay man na lalaki.

⁹Nagin bantog ako, dakula ki sa gabos na nag-erok sa Jerusalem. Nagdanay man sako an kadonongan.

¹⁰Nakamtan ko an anoman na minawot ko. Dai ko isinayuma sa sadiri ko an anoman na kaogmahan. Ipinag-orgulyo ko an gabos na ginibo ko, asin ini an premyo kan gabos kong ginibo.

¹¹Dangan pinaghorophorop ko an gabos kong ginibo asin an kapagalan sa paggibo kaiyan. Namidbid ko na gabos mayo nin halaga, asin garo sanang paglamag sa doros; mayo lamang nin pakinabang.

¹²Huli ta an nagigibo nin sarong hade arog man sana kan naginibo na kan mga naenot na hade. Kaya nagpoon akong mag-isip-isip dapit sa kahulogan kan pagigin madonong o rungaw o lolong.

¹³Dangan namidbid ko na an Kadonongan mas marahay ki sa kalolongan, siring na an liwanag mas marahay ki sa kadikloman.

¹⁴An madonong nakakahiling kan saiyang padudumanan, alagad an lolong naglalakaw sa kadikloman. Alagad aram kong saro sana an aabotan ninda gabos.

¹⁵Dangan nagsaboot ako, “An nangyari sa lolong mangyayari man sako, kaya ano an nakua ko sa pagigin madonong?” Sinimbag ko an sadiri ko na ini mayo man nin halaga.

¹⁶Mayo nin nakakagiromdom sa mga madonong, asin siring man sa mga lolong. Sa maabot na mga aldaw, an gabos malilingawan. An gabos magagadan, madonong man o lolong!

¹⁷Kaya ikinaongis ko an buhay, huli ta gabos kasakitan an dinara sako kaini. An gabos mayo nin halaga, asin garo sanang paglamag sa doros.

¹⁸Ikinaongis ko an gabos kong trabaho sa kinaban, huli ta aram kong iwawalat ko iyan sa masunod sako,

¹⁹asin siisay an makakasabi kun siya magigin madonong o lolong? Alagad masasadirihan niya an gabos kong pinagpagalan asin ginamitan nin kadonongan sa kinaban. Ini mayo man nin halaga.

²⁰Kaya nagbasol ako ta nagtrabaho ako nin maigot,

²¹huli ta kun minsan, an gabos na ginibo na may kadonongan, pakasabot asin pakaaram, iwawalat man sana sa saro katawo na dai man nagpagal kaiyan. Ini mayo man nin halaga, asin sarong dakulang karatan.

²²Ano an makukua nin tawo sa pagtrabaho asin pagpagal sa kinaban?

²³Huli ta an gabos niyang aldaw pano nin kasakitan, asin kulog nin boot; maski sa banggi daing pahingalo an saiyang isip. Ini mayo man nin halaga.

²⁴Mayo nin marahay para sa sarong tawo kundi an magkakan asin mag-inom patin mag-ogma sa saiyang pinagalan. Alagad nahiling ko na maski ini gikan man sa kamot nin Dios;

²⁵huli ta kun siblag saiya, siisay an pwedeng magkakan o mag-ogma?

²⁶An tawo na nakakapawili sa Dios tinatawan niya nin kadonongan, pakasabot asin kaogmahan; alagad an parakasala tinatawan niya kan trabaho nin pagtipon asin pagtambak nin kayamanan, tangani sanang itao iyan sa mga nawiwilihan nin Dios. Ini mayo nin halaga, asin garo sanang paglamag sa doros.