Read Central Bicolano Ecclesiastes 3 Bible Online

Ecclesiastes 3 - Central Bicolano bible

Ecclesiastes 3

¹An gabos na nangyayari digdi sa kinaban nangyayari sa panahon na pinili nin Dios:

²Panahon nin pagkamundag, asin panahon nin pagkagadan; panahon nin pagtanom, asin panahon nin paggabot kan itinanom;

³panahon nin paggadan, saka panahon nin pagpaomay; panahon nin pagrumpag, saka panahon nin pagtugdok;

⁴panahon nin pagtangis, dangan panahon nin pagngisi; panahon nin pagmondo, dangan panahon nin pagsayaw;

⁵panahon nin pagtapok nin mga gapo, asin panahon nin pagtipon kan mga iyan; panahon nin pagkukugosan, asin panahon sa pag-ontok sa pagkukugosan;

⁶panahon nin paghahanap, saka panahon nin pagkakawara; panahon nin pagsaray, saka panahon nin pagtapok;

⁷panahon nin paggisi, dangan panahon nin pagtahi; panahon nin pag-alo, dangan panahon nin pagtaram;

⁸panahon nin pagkamoot, asin panahon nin pagkaongis; panahon nin gera, asin panahon nin katoninongan.

⁹Ano an pakinabang na makukua kan tawo sa saiyang pagpagal?

¹⁰Aram ko na magabat na mga pasanon an itinao nin Dios sa sato.

¹¹An gabos na bagay tinawan nin talaan na panahon. Itinao niya sato an kamawotan para sa maabot na panahon, alagad dai niya kita tinatawan kan bilog na pakasabot kan saiyang ginibo poon sa kapinonan sagkod sa kataposan.

¹²Aram ko na mayo nin ibang marahay para sato kundi an mag-ogma saka maggayagaya mantang buhay pa kita.

¹³Regalo nin Dios sa tawo na siya magkakan asin mag-inom saka mag-ogma sa saiyang pinagpagalan.

¹⁴Aram kong nagdadanay sagkod pa man an gabos na ginibo nin Dios; dai iyan madudugangan o maiinaan. Ginibo niya iyan tanganing sa atubang niya magkatarakot an mga tawo.

¹⁵An nangyayari ngunyan o an mangyayari ngapit, nangyari na kaidto. An mga nakaagi ginigibo nin Dios na mangyari giraray.

¹⁶Laen pa kaini, embes na hustisya an mahiling ko sa kinaban, nahiling ko an karatan; embes na katanosan, an karatan.

¹⁷Nagsaboot ako, “Huhukoman nin Dios an mga matanos saka an mga maraot, huli ta nagtalaan siya nin panahon para sa gabos na bagay asin para sa gabos na gibo.

¹⁸Nagsaboot ako na binabalo kita nin Dios tanganing ipahiling na mayo man kita nin kalaenan sa mga hayop.

¹⁹Huli ta pareho an palad kan mga tawo asin kan mga hayop; pareho man sinda magagadan. Pareho man an saindang hinangos; mayo nin kalaenan an tawo sa hayop. Huli ta an buhay mayo nin halaga para sainda.

²⁰Pareho man an saindang padudumanan—gikan sinda sa alpog asin sa alpog sinda mabalik.

²¹Siisay an nakakaaram kun an espiritu nin tawo minapaitaas asin an espiritu kan hayop minapairarom sa daga?

²²Kaya nahiling ko na mayo nin marahay para sa tawo kundi an mag-ogma sa saiyang trabaho, huli ta iyan an saiyang palad. Mayo kita nin paagi tanganing maaraman ta an mangyayari pakatapos na kita magadan.