Read Central Bicolano Ecclesiastes 4 Bible Online

Ecclesiastes 4 - Central Bicolano bible

Ecclesiastes 4

¹Dangan hiniling ko giraray an gabos na inhustisya na ginigibo sa kinaban. Nagtatangis an mga inaapi asin mayo nin minaranga sainda, huli ta an mga nag-api sainda iyo an igwa nin kapangyarihan.

²Naghona ako na orog na paladan an mga gadan na ki sa mga buhay pa;

³alagad orog na paladan ki sa duwang ini an mga dai pa namundag saka dai pa nakahiling kan mga karatan na ginigibo sa kinaban.

⁴Nasabotan ko man an dahelan kun tano ta nagtatrabaho nin maigot an tawo; an dahelan iyo an pagkaori sa pagsadiri nin iba. Ini mayo nin halaga, asin garo man sana paglamag sa doros.

⁵Nagsasabi sinda na lolong an sarong tawo na magparapamungko asin ginagadan an sadiri sa gutom.

⁶Pwedeng tama iyan. Alagad mas marahay na igwa ka nin kadikit na nasasaray, na may katoninongan sa isip, ki sa padagos kang magpagal na garo man sanang paglamag sa doros.

⁷Nahiling ko pa sa kinaban an sarong bagay na mayo nin halaga.

⁸An sarong tawo na nabubuhay na solo-solo, mayo nin aki o tugang, alagad mayong kataposan an pagtrabaho niya, asin an saiyang mata nakukulangan pa kan saiyang kayamanan. Para kiisay an saiyang pagpagal saka pagsayuma niya nin kaogmahan sa sadiri? Ini man mayo nin halaga asin sarong mamondong kamugtakan.

⁹An duwa mas marahay ki sa saro, huli ta mas dakul an magigin marahay na bunga kan saindang kapagalan.

¹⁰Kun matumba an saro sainda, tatabangan siyang magtindog kan saro; alagad herak man sa nagsosolo-solo kun siya matumba, huli ta mayo nin matabang saiya na makatindog.

¹¹Siring man kun malipot, an duwa pwedeng taed na maghigda tanganing magpahimbong; alagad paano an pagpahimbong kan nagsosolo sana?

¹²An saro pwedeng daogon nin saro katawo; alagad ini malalabanan nin duwa. Dai tolos mapapatod an linubid na tinolo-tolo.

¹³Mas marahay an sarong hoben na dukha alagad madonong ki sa sarong gurang nang hade alagad mangmang asin habo nang magpahatol,

¹⁴maski ngani hale siya sa kadukhaan dangan nagin hade nin saiyang banwaan, o gikan sa bilanggoan dangan nakamtan an trono.

¹⁵Nahiling ko an gabos na tawong nabubuhay sa kinaban, asin namidbid ko na kabilang sainda an sarong hoben na lalaki na iyo an magigin kasalihid kan hade.

¹⁶Maski dai mabilang an mga tawong nasasakopan kan hade, alagad pakagadan niya, dai siya pasasalamatan kan mga masurunod saiya. Ini mayo nin halaga asin garo man sanang paglamag sa doros.