Read Central Bicolano Song of Solomon 4 Bible Online

Song of Solomon 4 - Central Bicolano bible

Song of Solomon 4

¹Magayon ka nin marahay, sakong namomotan! Sa pagkamoot, nagkikinang nin marahay an saimong mga mata sa likod kan saimong belo. Nagsasayaw an saimong buhok arog sa mga kanding na naglulukso paibaba kan mga bulod nin Gilead.

²An saimong mga ngipon maputi arog sa mga karnero na bago pa sanang guntingan asin karigoson. Gabos na ngipon mo igwa nin kahampang, maski saro mayo nin kulang.

³An saimong mga ngabil arog sa eskarlatang torsido; magayon sinda nin marahay orog na kun ika nagtataram. Namumula an saimong pisngi sa likod kan saimong belo.

⁴An saimong liog arog sa tore ni David, bilog asin malinig, na nabibitayan nin sangribong saradit na kalasag, gabos kalasag nin maiisog.

⁵An saimong daghan garo mga usa, kambal na usa na nagsasabsab sa tahaw nin mga lirio.

⁶Maontok ako sa bulod nin mira, an bulod nin insenso, sagkod na maghoyop an doros na makaaga asin mawara an mga anino.

⁷Magayon ka nin marahay, sakong namomotan; mayo ka nin kaninan!

⁸Sakong agom, umiba ka sako hale sa kabukidan nin Lebanon; umiba ka sako hale sa Lebanon. Lumogsot ka hale sa alitoktok kan Bukid nin Amana, hale sa Bukid nin Senir asin Bukid nin Hermon, saen nag-eerok an mga leopardo asin mga leon.

⁹An saimong mga mata saka an sulot mong kulintas, iyo an nakabihag kan sakong puso, sakong namomotan asin agom.

¹⁰Mahamis nin marahay an saimong pagkamoot, sakong namomotan asin sakong agom. Orog karahay an saimong pagkamoot ki sa arak; asin an parong kan saimong pahamot ki sa arin man na pahamot.

¹¹Yaon sa saimong mga ngabil an namit kan dugos, sakong namomotan; para sakuya, gatas asin dugos an saimong dila. Yaon sa saimong gubing an gabos na hamot nin Lebanon.

¹²Sarong tatamnan na natatago an sakong namomotan asin agom, sarong nakukudalan na tatamnan, sarong burabod na napipintoan;

¹³duman nagtatalubo an mga tinanom. Nagtatalubo sinda arog sa tatamnan nin mga kahoy na granada, asin namumunga kan pinakamagayon na mga bunga. Dai nagkukulang an hena saka nardo,

¹⁴an sapran, kalamo, asin an kanela, o an gabos na klase nin insenso. An mira asin an aloe nagtatalubo duman kaiba kan gabos na pinakamarahay na pahamot.

¹⁵Nag-uulantong na mga tubig an nagbabaribi sa tatamnan, burabod nin nagbubulos na tubig, mga sapa na nagbubulos paibaba hale sa mga Bukid nin Lebanon.

¹⁶Pagmata, amihan na doros, asin madya, habagat na doros! Paghoyop sa sakong tatamnan; warakan an hamot kaiyan. Padoloka sa saiyang tatamnan an sakong namomotan asin pakakana kan mga piling bunga kaiyan.