Read Central Bicolano Song of Solomon 5 Bible Online

Song of Solomon 5 - Central Bicolano bible

Song of Solomon 5

¹Naglaog na ako sa sakong tatamnan, sakong namomotan, sakong agom. Tinitipon ko an sakong pahamot saka mira; kinakakan ko an sakong dugos asin anira; iniinom ko an sakong arak saka gatas. Kakan kamo asin inom o nagkakaminootan sagkod na maburat kamo sa pagkamoot!

²Maski nagtotorog ako, mata an sakong puso. Nangatorogan akong nagtoktok sa pintoan an sakong namomotan. Palaoga ako, sakong namomotan, sakong pagkamoot, sakong salampati. Dumog an sakong payo kan ambon, asin an sakong buhok kan tonog nin kabanggihon.

³Naghuba na ako; tadaw ta isusulot ko giraray an sakong gubing? Naghugas na ako kan sakong mga bitis; tadaw ta aatian ko pa iyan giraray?

⁴Kinapotan kan sakong namomotan an pintoan, asin naglulukso an puso ko sa kaogmahan.

⁵Nagbangon ako tanganing palaogon an sakong namomotan, asin nagtatagdo an sakong kamot nin mira, mantang pugol ko an kakaptan kan pintoan.

⁶Binukasan ko an pintoan para sa sakong namomotan, alagad mayo na siya duman. Mawot ko nanggad na madangog an saiyang tingog! Hinanap ko siya, alagad dai ko nanumpongan; inapod ko siya, alagad mayo akong nadangog na simbag.

⁷Nanumpongan ako kan naglilibot na mga bantay kan syudad; hinampak ninda ako asin linugadan; an sakong alikboy inagaw kan mga bantay kan kudal kan syudad.

⁸Magsumpa kamo, mga babae nin Jerusalem, na kun manumpongan nindo an sakong namomotan, sasabihan nindo siyang nanluluya ako sa pagkamoot.

⁹O pinakamagayon sa mga babae, may kalaenan daw an saimong namomotan sa ibang lalaki? Ano an makangangalas dapit saiya tanganing magsumpa kami saimo?

¹⁰Gwapo asin makosog an sakong namomotan; napapalaen siya sa sampolong ribo.

¹¹An saiyang payo siring sa purong bulawan; an saiyang buhok nag-aalon, siring sa uwak sa kaitoman.

¹²An saiyang mga mata magagayon siring sa mga salampati sa kataed kan mga burabod nin tubig, mga salampati na kinarigos nin gatas asin nagtitindog sa may sapa.

¹³An saiyang mga pisngi magayon arog sa sarong tatamnan na nagwawarak nin mga pahamot. Siring sa mga lirio an saiyang mga ngabil, na dumog nin mira.

¹⁴Magagayon an saiyang mga kamot, asin nagsusulot siyang mga singsing na tinampokan nin mamahalon na mga bato. An saiyang hawak siring sa malinig na marpil, na tinampokan nin mga sapiro.

¹⁵An saiyang hita siring sa hariging alabastros na namumugtak sa mga patungtongan na bulawan. Magayon siring sa mga Bukid nin Lebanon, na makukuahan kan haralangkaw na sedro.

¹⁶An saiyang ngoso mahamis paghadokan; nakakadagka an bilog niyang pagkatawo. Siring kaiyan an sakong namomotan, mga babae nin Jerusalem.