Read Central Bicolano Song of Solomon 6 Bible Online

Song of Solomon 6 - Central Bicolano bible

Song of Solomon 6

¹O pinakamagayon sa mga babae, saen nagduman an saimong namomotan? Tarami kami kun arin na dalan an saiyang inagihan, tanganing sa paghanap, ika samong matabangan.

²Nagduman sa saiyang tatamnan an sakong namomotan, sa tatamnan nin mga pahamot, tanganing pasabsabon sa tatamnan an saiyang mga hayop, asin tanganing magkua nin mga lirio.

³Sadiri ako kan sakong namomotan, asin siya sadiri ko; pinapasabsab niya an saiyang mga hayop sa tahaw nin mga lirio.

⁴Magayon ka siring sa Jerusalem, sakong namomotan magayon siring sa syudad nin Tirsa, makangirhat siring sa sarong hukbo na igwang mga bandera.

⁵Dai mo ipagturuhok sako an mga mata mo, huli ta binibihag ninda ako. An saimong buhok arog sa sarong ariponpon nin mga kanding na nagdadalagan paibaba sa bulod nin Gilead.

⁶An saimong mga ngipon siring kaputi sa ariponpon nin karnero na tapos pa sanang karigoson. Gabos mong ngipon igwa nin kahampang; maski saro, mayo nin kulang.

⁷Namumula an saimong pisngi sa likod kan saimong belo.

⁸Pabayae an hade na magkaigwa nin sesentang reyna, otsentang kasaroan, asin dai mabilang na mga daraga!

⁹Alagad saro sana an sakong namomotan, asin siring sa salampati an saiyang kagayonan. Siya sana an aking babae kan saiyang ina, an padangat na aki kan saiyang ina. Nahiling siya kan mga daraga asin inapod siyang paladan; an mga reyna saka mga kasaroan nag-awit saiya nin mga pag-omaw.

¹⁰Siisay ini na kun minahiling arog sa kaagahon? Magayon siya siring sa bulan, maliwanag siring sa aldaw.

¹¹Nagduman ako sa tatamnan nin mga kahoy na almendras tanganing hilingon an sadit na mga tinanom sa kapantayan, tanganing hilingon kun nagdahon na an mga balagon asin kun namurak na an mga granada.

¹²Nagtatakig ako; huli saimo, minamawot ko an pagkamoot siring na an parapadalagan nin karwahe nagmamawot nin ralaban.

¹³Magsayaw ka, magsayaw ka, o Sulamita, huli ta hihilingon mi ika. Tadaw ta boot nindong pagmasidan ako mantang nagsasayaw sa tahaw nin duwang hukbo?