Read Central Bicolano Song of Solomon 7 Bible Online

Song of Solomon 7 - Central Bicolano bible

Song of Solomon 7

¹Magayon nin marahay an saimong mga bitis sa sulot mong sandalyas, o daragang garo reyna! An porma kan saimong mga hita garo mga alahas na ginibo nin sarong eksperto.

²An saimong pusod garo matalimon na mangko na dai nawawaraan nin tinimplang arak. An saimong puson garo tambak nin trigo, na napapalibotan nin mga lirio.

³An saimong daghan garo kambal na ogbon nin usa.

⁴An saimong liog garo toreng marpil. An saimong mga mata garo mga sapa nin Hesbon, sa may trangkahan nin Bat-rabbim. An saimong dungo garo tore nin Lebanon, na minadungaw sa Damasco.

⁵An saimong payo nakakabaing sa Bukid nin Carmelo. An sinalapid mong buhok nagkikintab arog sa pinong seda; an gayon kaiyan nakakabihag nin hade.

⁶Magayon ka nin marahay, O namomotan; an itinatao kan saimong pagkamoot bilog na kaogmahan.

⁷An saimong tindog siring sa kahoy na palma, asin an saimong daghan nakakaagid sa mga bunga kaiyan.

⁸Sasakaton ko an poon nin palma asin mamumugol ako sa saiyang mga sanga. Para sako, an saimong daghan siring sa mga pungot nin ubas, an parong kan saimong hinangos arog sa mansanas,

⁹asin an saimong ngoso siring sa pinakamarahay na arak. Pabulosa an arak pasiring sa sakong namomotan, magbubulos sa ibabaw kan saiyang mga ngabil saka ngipon.

¹⁰Sadiri ako kan sakong namomotan, asin ako an saiyang minamawot.

¹¹Madya, sakong namomotan, maduman kita sa kaomahan asin magkatorog kita sa mga baryo.

¹²Mabangon kitang amay asin maduman sa mga ubasan tanganing hilingon kun nagdadahon na an mga balagon, kun nagbubukad na an mga burak asin kun nagbuburak na an mga granada. Duman ko itatao saimo an sakong pagkamoot.

¹³Mapaparong mo an hamot kan mga mandragora, asin an gabos na piling bunga yaon sa may pintoan nyato. O namomotan, tinagamahan taka kan gabos na piling bunga, an daan saka an bago.