Read Central Bicolano Wisdom 1 Bible Online

Wisdom 1 - Central Bicolano bible

Wisdom 1

¹Kamotan nindo an hustisya, kamong mga pamayo kan daga; an Kagurangnan iyo an saindong isipon, asin hanapa nindo siya sa bilog nindong puso.

²Huli ta makukua siya kan mga dai nagbabalo saiya; nagpapahiling siya sa mga nananarig saiya.

³An marigsok na mga kaisipan iyo an minasiblag kan mga tawo sa Dios, asin kun binabalo an saiyang kapangyarihan, kinokondenar kaiyan an mga lolong.

⁴Huli ta an kadonongan dai nanggad malaog sa sarong tawong madaya, ni maerok sa sarong oripon nin kasalan.

⁵An sarong banal asin disiplinadong espiritu minadulag sa kadayaan asin sa mga lolong na kaisipan. Nasosopog iyan kun minadangadang an inhustisya.

⁶An kadonongan sarong maboot na espiritu alagad dai niya patatalingkason sa padusa an sarong paralanghad sa Dios, huli ta an Dios iyo an saksi kan pinakairarom na kamatean nin tawo, an parabantay kan saiyang puso asin paradangog kan saiyang tinataram.

⁷An espiritu nin Kagurangnan nakakapano sa bilog na kinaban asin siya an nagpupugol kan gabos, kaya nakakaaram siya kan gabos.

⁸Kaya mayo nin siisay man na maraot an itinataram na makakaligtas saiya, asin dai mahahaloy, aakoon kan tawong iyan an matanos na padusa.

⁹Sisiyasaton an mga hatol nin sarong bakong diosnon na tawo; an saiyang mga tataramon ihahayag sa Kagurangnan tanganing kondenaron an saiyang karatan.

¹⁰Nadadangog nin Kagurangnan an gabos, maski an mga ngorob-ngorob.

¹¹Kaya maglikay kamo sa mayong halagang pagngorob-ngorob asin sa paglibak, huli ta mayong maraot na tataramon na dai pinapadusahan, saka an pagputik nakakaraot sa kalag.

¹²Dai mo pag-alokon an kagadanan huli sa sala mong mga gibo,

¹³huli ta bakong an Dios an naglalang kan kagadanan asin dai siya naoogma sa kagadanan nin siisay man na tawo.

¹⁴Linalang niya an gabos tanganing padagos na mabuhay, asin an saiyang mga linalang gabos marahay saka dai nakakahudong; an kapangyarihan nin kagadanan dai naghahade sa daga.

¹⁵Huli ta an katanosan mayo nin kagadanan.

¹⁶Alagad huli sa mga tataramon asin gibo kan mga bakong diosnon na tawo, an kagadanan uminabot. Minidbid ninda siya bilang katood, asin nakipagtipan sinda saiya huli ta maninigo sinda sa kaibahan niya; kaya siya an napasainda.