Read Central Bicolano Wisdom 11 Bible Online

Wisdom 11 - Central Bicolano bible

Wisdom 11

¹An banwaan nin Israel pinauswag nin Kadonongan sa paagi nin sarong banal na propeta.

²Nagbaklay an banwaan na ini sa kalangtadan na mayo nin nag-eerok, dangan nagpatindog kan saindang mga tolda sa lugar na dai pa lamang nadumanan nin tawo.

³Inatubang ninda asin linabanan an saindang mga kaiwal.

⁴Kan mapaha sinda, nag-apod sinda saimo, Kagurangnan, asin tinawan mo sinda nin tubig hale sa matagas na gapo.

⁵An mga kasakitan na nagin padusa sa mga Egipcio iyo an nagligtas sa saimong banwaan, kan sinda nasa kasakitan.

⁶Huli ta an mga kaiwal na idto nagboot na garadanon an mga aki kan saimong banwaan, binukag mo an ginigikanan kan danay na nagbubulos nindang salog dangan ginibong maati iyan huli sa dugo. Duman sa kalangtadan, tinugotan mong mapaha an saimong banwaan tanganing manamitan ninda kun paano mo pinadusahan an saindang mga kaiwal. Dangan tinawan mo nin dakul na tubig an saimong banwaan kan dai ninda linalaom na mangyari iyan.

⁹Kan binalo mo sinda, maski ngani saro idtong disiplina na may pagkaherak, nanodan ninda kun paano mo pinadusahan sa saimong kaanggotan an mga tampalasan.

¹⁰Binalo mo an saimong banwaan, siring sa sarong ama na nagbabalo sa saiyang kaakian, tanganing patanidan sinda. Alagad, siring sa sarong estriktong hade, hinukoman mo asin kinondenar an saindang mga kaiwal.

¹¹Nagtios an mga Egipcio, harani man sinda o harayo sa saimong banwaan.

¹²Nadoble an saindang kamondoan; nag-agrangay sinda mantang ginigiromdom an nangyari.

¹³Kan maaraman ninda na an padusa sainda nagin karahayan kan saimong banwaan, nasabotan ninda na gibo mo idto, Kagurangnan.

¹⁴An mga Egipcio habo nang makilabot sa lalaking idto, na kan aki pa, itinapok asin binayaan sa luwas; alagad pakatapos kan mga pangyayari, nagngalas sinda saiya. An matanos dai nanggad nagtios kan pagkapaha arog kan tinios ninda.

¹⁵Bilang balos sa saindang kalolongan saka maraot na mga kaisipan, na naglagalag sainda sa pagsamba sa mga halas asin iba pang makauuyam na mga hayop, pinadarahan mo sinda nin dai mabilang na mga hayop na mayo man nin mga isip tanganing padusahan sinda,

¹⁶asin tanganing manodan ninda na an sarong tawo pinapadusahan sa paagi kan mga bagay mismo na nagin dahelan kan saiyang pagkakasala.

¹⁷Kagurangnan, an mapangyari mong kamot iyo an naglalang kan kinaban hale sa bagay na mayo nin anoman na porma. An mga tawong idto pwede mo kutanang padusahan sa paagi nin pagsalakay nin dakul na oso saka maringis na mga leon.

¹⁸Pwede kutanang naglalang ka nin bago saka dai midbid na mga hayop na pano nin kaanggotan, na nagbubuga nin kalayo o mahibog na aso, o nagpapaluwas nin makatatakot na silyab hale sa saindang mga mata.

¹⁹Pwede kutanang naggibo ka nin mga hayop na arog kaini, na dai na kaipuhan pang magsalakay sa mga tawong idto, kundi matatakot na sinda sagkod na magadan kun mahiling ninda an mga ini.

²⁰Alagad dai na iyan kaipuhan. Pwede man kutanang lamagon mo sinda kan saimong hustisya o gadanon sinda sa dikit na tanda kan saimong kapangyarihan. Alagad pinili mong sukolon, bilangon, asin timbangon an gabos mong gibo.

²¹Pwede kang magpahiling kan dakula mong kapangyarihan anoman na oras na mawoton mo, asin mayo nin makakatagal kaiyan.

²²Sa atubang mo, an bilog na kinaban garo saro sanang batiris na an gabat dai lamang nakakapahiro sa timbangan, o sarong tagdo nin ambon sa daga kun aga.

²³Pwede mong gibohon an gabos, alagad maheherakon ka sa gabos; pinapasipara mo an samong mga kasalan, asin tinatawan mo kami nin panahon tanganing kami makapagsolsol.

²⁴Namomotan mo an gabos na igwa nin buhay; dai mo ikinakaongis an arin man sa saimong linalang. Kun dai mo iyan namotan, dai mo na kutana linalang.

²⁵Paanong magdanay an arin man na bagay kun habo mo? Paanong makakapadagos iyan kun dai mo man iyan linalang?

²⁶Iyan gabos tinutugotan mong mabuhay, O Kagurangnan, huli ta sadiri asin namomotan mo an gabos na igwa nin buhay.