Read Central Bicolano Wisdom 12 Bible Online

Wisdom 12 - Central Bicolano bible

Wisdom 12

¹Yaon sa lambang saro sainda an saimong espiritu na mayo nin kagadanan,

²asin luway-luway mong sinasagwe an nagkakasala saimo. Pinapagiromdom mo sinda kan saindang ginigibo asin pinapatanidan, tanganing bayaan ninda an maraot nindang gibo asin magsarig saimo, Kagurangnan.

³An mga nag-erok kaidtong panahon sa saimong banal na daga

⁴saimong naongisan huli kan makauuyam nindang gibo, kan saindang mga salamangka asin bakong mga banal na pagsamba.

⁵Mayong pagkaherak na ginadan ninda an saindang mga aki, asin kinakan ninda an laman saka dugo nin tawo. Inako sinda bilang mga bagohan sa sekretong mga seremonya,

⁶saen ginagadan kan mga magurang an saindang mga aki na mayo pang pakaaram sa buhay. Kabotan mo na an mga tawong idto gadanon kan samong mga ginikanan,

⁷tanganing an daga, na para saimo iyo an pinakamahalaga sa gabos na daga, iyo an magin maninigong erokan kan saimong banwaan.

⁸Alagad maski sa bagay na ini, ipinahiling mo an saimong pagkaherak sa saindang mga kaiwal, huli ta mga tawo man sinda. Nagpadara ka nin mga kutakti sa enotan kan saimong hukbo, tanganing luway-luway na ronoton sinda.

⁹Pwede kutanang tinugotan mo an mga matanos na gadanon sa gera an bakong diosnon na mga tawo; pwede kutanang rinonot mo sinda tolos-tolos sa paagi nin mga lalaw na hayop o sa paagi nin saro mo sanang pagboot.

¹⁰Alagad embes kaiyan, luway-luway mo sindang hinukoman, tanganing tawan sinda nin panahon na makapagsolsol, maski ngani aram mong maraot na rasa an saindang ginikanan, saka nagin maraot na sinda poon pa kan sinda mamundag asin dai na nanggad sinda magbabago nin isip.

¹¹Huli ta sa kapinonan, minaldisyon na an saindang nasyon, asin maski dai mo sinda pinadusahan kan saindang mga kasalan, iyan bakong huli ta ika takot sa kiisay man.

¹²Linalang mo an mga masombikal na tawong idto, asin mayo nin makakadepensa sainda o makakakondenar saimo sa ginibo mong pagtunaw sainda. Mayo nin pwedeng maghapot kun ano an saimong ginibo o siisay an masabing sala an samong paghukom.

¹³An gabos na bagay nasa pangataman mo, asin mayo na nin ibang dios na aatubangon tanganing patunayan na tama an saimong paghukom.

¹⁴Mayo nin hade o pamayo sa daga na pwedeng magbasol saimo na bakong matanos an pagpadusa mo sa mga tawong idto.

¹⁵Matanos ka asin matanos mong pinaghahadean an gabos. Dai mo pa lamang ginamit an kapangyarihan mo sa pagkondenar nin sarong tawo na bakong maninigong padusahan.

¹⁶An saimong kosog iyo an ginigikanan nin hustisya. Pwedeng maherak ka sa kiisay man, huli ta ika an Kagurangnan kan gabos.

¹⁷Ipinapahiling mo an saimong kosog kun an mga tawo nagduduwa-duwa sa kapanoan nin saimong kapangyarihan; pinapadusahan mo an siisay man na nakakamidbid kan saimong kapangyarihan alagad dai iyan ninda pinapahalagahan.

¹⁸Maski mayong sukol an saimong kapangyarihan, alagad saro kang maheherakon na hukom. Pwede mo kutanang gibohon samo an anoman na boot mo, alagad matinios mo kaming pinaghahadean.

¹⁹Huli sa mga bagay na ginibo mo, tinukdoan mo an saimong banwaan na an sarong matanos na tawo dapat man na magin maboot. An saimong banwaan tinawan mo nin dakulang paglaom, sa pagtao sainda nin panahon tanganing magsolsol kan saindang mga kasalan.

²⁰Maingat ka asin matinios sa pagpadusa sa mga kaiwal kan saimong banwaan; maski maninigo na sindang gadanon, tinawan mo pa sinda nin panahon saka oportunidad na talikodan an saindang kasombikalan.

²¹Alagad estrikto mong hinukoman an sadiri mong banwaan, maski naggibo ka nin mga tipan sa saindang mga ginikanan asin nanuga kang tatawan sinda nin mga marahay na mga bagay.

²²Kaya maski pinapadusahan mo kami, an samong mga kaiwal pinapadusahan mo nin sampolong ribong beses, tanganing kun hukoman nyamo an iba, magiromdoman nyamo an saimong pagkamarahayon, asin kun kami an hinuhukoman, pwede kaming maglaom na kami maheherakan.

²³Kaya pinasakitan mo idtong mga tawo, na sa kalolongan namuhay sa kasombikalan—pinasakitan mo sinda sa paagi kan makauuyam na mga bagay na sinamba ninda.

²⁴Harayo nin marahay sa katotoohan na nalagalag sinda, asin sinamba ninda bilang mga dios-dios idtong mga hayop na ikinauyam maski kan saindang mga kaiwal. Nadaya sinda na garo mga sadit na aki.

²⁵Kaya pinadusahan mo sinda huli kan saindang kamangmangan, asin ipinahiling kan saimong paghukom na garo sinda mga lolong.

²⁶Magian an padusang idto, alagad an mga dai nagpahalaga sa siring na mga patanid maninigong mag-ako kan gabos na gabat kan paghukom nin Dios.

²⁷Kan padusahan sinda sa paagi kan mga linalang na minidbid ninda bilang mga dios-dios, nahiling ninda asin namidbid na an tunay na Dios iyo idtong danay na isinikwal nindang midbidon. Kaya inako ninda an huring padusa.