Read Central Bicolano Wisdom 13 Bible Online

Wisdom 13 - Central Bicolano bible

Wisdom 13

¹Lolong an siisay man na tawo na dai nakakamidbid sa Dios. Hinihiling kan siring na mga tawo an mga marahay na bagay sa palibot ninda, alagad dai pa giraray nakakamidbid sa Dios. Inadalan ninda an mga bagay na linalang niya, alagad dai ninda namidbid an naglalang kan mga iyan.

²Embes kaiyan, naghohona sinda na an mga dios-dios na naghahade sa kinaban iyo an kalayo o an doros o an bagyo o an naglilibot na mga bitoon o an nag-aalon na tubig o an mga bagay na nagliliwanag sa kalangitan.

³An kagayonan kan mga bagay na iyan nawiwilihan kan mga tawo, kaya ibinilang nindang mga dios-dios; alagad dapat nindang masabotan na an mga bagay na iyan igwa nin kagurangnan, asin na siya an mas dakula ki sa gabos na iyan, huli ta siya an kaglalang kan mga bagay na iyan.

⁴Huli ta an mga tawo nagngalas sa kapangyarihan kan mga bagay na iyan asin kun paano sinda naghihiro, dapat na manodan ninda huli sa mga bagay na iyan na an kaggibo sainda orog pang mapangyari.

⁵Huli sa paghiling ta sa kahiwasan asin sa kagayonan kan linalang namimidbidan ta an Kaglalang.

⁶Alagad dai man nyato mababasol nanggad an mga tawong ini. Huli ta tibaad mawot man nanggad nindang makua an Dios alagad dai ninda siya nakua.

⁷Huli ta maski napapalibotan sinda kan mga gibo nin Dios, padagos pa nindang hinihiling an mga ini, sagkod na maghona sindang mga dios-dios an mga iyan huli kan saindang kagayonan.

⁸Alagad sa katotoohan, mayo sinda nin dahelan tanganing dai sinda salaon.

⁹Huli ta kun igwa sinda nin dakulang kapangyarihan sa pagsiyasat kan kinaban, tano ta dai nanggad ninda nakua an Kagurangnan kan gabos na bagay?

¹⁰Alagad an orog na makaheherak na mga tawo iyo idtong nagbubugtak kan saindang paglaom sa mga bagay na mayo nin buhay, an mga nagsasamba sa mga bagay na gibo nin tawo—mga ladawan nin mga hayop na magayon an pakagibo sa bulawan saka plata, o sa mayong halagang gapo na inukitan kaidto pang panahon.

¹¹An sarong kahoy pwedeng lagadion nin sarong ekspertong paralabra nin kahoy, ubakan ini dangan huli kan kakayahan niya, gibohon niya ining sarong bagay na makakatabang sa mga pangangaipo nin tawo.

¹²An mga natadang pedaso kan kahoy gagamiton niya bilang igatong sa pagluto nin kakanon na makakapabasog saiya.

¹³Alagad sa mga tadang pedaso nin kahoy na mayo na nin pakinabang, pwede siyang kumua nin sarong pedaso—na pwedeng tiko o pano nin urat—dangan kun mayo siyang gibo, gamiton an dikit niyang panahon tanganing pormahon iyan na magin sarong ladawan nin sarong tawo,

¹⁴o nin sarong mayong halagang hayop. Pinipintahan niya ini nin pula asin tinatahoban an gabos na kaninan.

¹⁵Dangan inaandaman niya ini nin maninigong lugar sa lanob saen ipinapako niya ini.

¹⁶Iniingatan niyang dai mahulog ini, huli ta aram niyang saro sana ining ladawan na nangangaipo nin tabang; dai kaiyan pwedeng tabangan an sadiri.

¹⁷Alagad dai siya nasosopog na magpamibi sa mayong buhay na bagay na iyan dapit sa saiyang agom, mga aki, saka pagsadiri.

¹⁸Maluya iyan, alagad pinapamibian niya para sa marahay na hawak. Gadan iyan, alagad hinahagadan niya nin buhay. Mayo iyan nin eksperyensya, alagad hinahagadan niya nin tabang. Dai iyan nakakalakaw, alagad pinapamibian niya para sa marahay na pagbyahe.

¹⁹An mga kamot kaiyan mayo nin kapangyarihan, alagad hinahagadan niya nin tabang sa pagnenegosyo, sa paghanap nin kwarta, asin sa saiyang trabaho.