Read Central Bicolano Wisdom 14 Bible Online

Wisdom 14 - Central Bicolano bible

Wisdom 14

¹Siring man, an sarong tawong nag-aandam sa pagsakay sa anggot na dagat naghahagad nin tabang sa sarong pedasong kahoy na orog na matapo ki sa sakayan na lulunadan niya.

²Sarong tawong nagmawot nin ganansya an nagplano kan porma kan sakayan, asin sarong may abilidad na tawo an guminibo kaiyan.

³Alagad, an pangataman mo, O Ama, iyo an naggigiya kaiyan; tinatawan mo iyan nin ligtas na dalan sa mga alon kan dagat.

⁴Maski an mga tawong mayo nin abilidad pwedeng magpadagat, huli ta iliniligtas mo sinda sa kapahamakan.

⁵Kabotan mong magamit an mga bagay na ginibo mo huli kan saimong kadonongan. Kaya an mga tawo pwedeng magsakay sa dagat na lunad sa sarong sakayan dangan ligtas na makadoong sa daga huli ta nananarig sinda sa sadit na pedaso nin kahoy na idto.

⁶Arog kaini kaidtong panahon, kan nawawara na an sarong mapaabaw-abaw na rasa nin mga higante. An paglaom kan kinaban nagpaili sa siring na sakayan na nasa pangataman mo dangan nagwalat sa kinaban nin sarong bagong henerasyon na mapadagos kan rasa nin tawo.

⁷Benendisyonan an arko ni Noe na nagin paagi tanganing magdanay an katanosan,

⁸alagad isinumpa an ladawan na ginibo nin tawo. Isinumpa man an naggibo kaiyan, huli ta guminibo siya nin sarong bagay na mawawara sana dangan inapod niya iyan na sarong dios.

⁹Ikinakaongis nin Dios an bakong diosnon na mga tawo asin an bakong diosnon na mga bagay na ginibo ninda.

¹⁰Papadusahan nin Dios an mga bagay na ginibo asin sa mga tawong naggibo kaiyan.

¹¹Kaya an paghukom nin Dios mahugpa sa mga paganong ladawan, huli ta maski ngani ginibo an mga iyan hale sa mga bagay na linalang nin Dios, nagin makauuyam an mga bagay na iyan na naglitag kan mga kalag nin lolong na mga tawo.

¹²An kaisipan na maggibo nin mga ladawan iyo an kapinonan nin karigsokan. Poon na gibohon an mga iyan, dinigtaan na kaiyan an buhay nin tawo.

¹³Mayo man kaidto nin mga ladawan asin an mga iyan dai man magdadanay.

¹⁴An kapaabaw-abawan nin tawo iyo an nagdara sainda sa kinaban, kaya marikas man na kataposan an inandam para sainda.

¹⁵Igwa kaidto nin sarong ama na namondo nin marahay huli ta bako pang panahon na nagadan an saiyang aki, kaya guminibo siya nin sarong ladawan kan aking idto na biglang kinua saiya. Kaya inomaw niya an sarong tawong gadan bilang sarong dios, asin an mga sakop niya tinawan niya nin sekretong mga seremonya.

¹⁶Sa pag-agi kan panahon, orog na kuminosog an bakong diosnon na kaugalean na idto. Sa kataposan, nagin sarong togon iyan, asin sa pagboot kan mapangyaring mga hade sinamba na an mga ladawan.

¹⁷Kun harayo an erokan kan mga tawo asin dipisil sindang makatao nin kaomawan sa saindang namamayo, iniisip na sana ninda an saiyang itsura dangan minagibo sinda nin ladawan na nakakaagid saiya.

¹⁸An ambisyosong mga paragibo nin mga ladawan iyo an nagpalakop kan pagsambang ini, maski dai man midbid kan mga tawo an saindang hade.

¹⁹An sarong paragibo nin ladawan, na nagmamawot na mawilihan kan hade, pwedeng gumibo nin ladawan kan hade na mas magayon pa an porma ki sa mismong hade.

²⁰Dangan an mga tawo madadagka nin marahay kan ladawan, kaya sinasamba na ninda iyan, na kaidto tinatawan sana ninda nin pag-omaw bilang sarong tawo.

²¹Kaya ini nagin sarong tago na litag para sa mga tawo, huli ta an mga tawong nagmomondo o nasasakopan kan kapangyarihan kan hade, minatao sa mga kahoy o mga gapo kan kaomawan na maninigo sanang itao sa Dios.

²²Pakatapos kaiyan, bako sanang nasala sinda manongod sa pagsabot sa Dios, kundi nabuhay sinda sa dakulang pakikilaban sa karatan, dangan sa saindang kamangmangan an mga pakikilaban na iyan sa karatan inapod nindang katoninongan.

²³Ginadan ninda an mga aki sa mga seremonya nin pag-ako sa mga bagong kaayon, nagselebrar sinda nin sekretong mga misteryo asin nagdororogan sa nalalaen na mga paagi.

²⁴Dai na ninda pinadanay na mayong digta an saindang buhay o an saindang pag-inagoman. Sa pasaluib na paagi, pwedeng gadanon nin sarong tawo an saiyang kapwa o mapamondo sa paagi nin pagdorog sa agom kaini.

²⁵An gabos nagin sarong dakulang kariribokan nin madugong garadanan, harabonan, darayaan, karigsokan, pagkawara nin kaimbodan saka orden, kaputikan,

²⁶pananakot sa mga tawong inosente, paglingaw kan mga utang na boot, pagdigta kan mga kalag, kasalan sa laman, pagsiriblagan nin mag-aragom, dororogan, saka karigsokan.

²⁷An pagsamba sa mga dios-dios, na an mga ngaran dai dapat sambiton, iyo an kapinonan saka kataposan, an dahelan asin an bunga nin lambang karatan.

²⁸An mga nagsasamba sainda garo mga lolong na nagpaparataram sa kaogmahan, o nagpopropesiya nin kaputikan, o namumuhay sa karatan o tolos-tolos na minapainda sa saindang mga tataramon.

²⁹Nagpuputik sinda maski nanumpa nin katotoohan, asin dai natatakot na papadusahan sinda huli ta an sinasarigan nindang mga dios-dios mayo man nin buhay.

³⁰Alagad aabotan man giraray sinda nin padusa sa duwang dahelan: enot, nasala sinda manongod sa Dios huli ta nagsamba sinda sa mga dios-dios, asin ikaduwa, dai ninda pinahalagahan an kabanalan kaya nanumpa sinda nin kaputikan tanganing dayaon an mga tawo.

³¹Kun nagkakasala an bakong matanos na mga tawo, an malamag sainda bako an kapangyarihan kan mga bagay na sinumpaan ninda, kundi an padusa na maninigo sa mga parakasala.