Read Central Bicolano Wisdom 16 Bible Online

Wisdom 16 - Central Bicolano bible

Wisdom 16

¹Kaya maninigo na an mga tawong ini padusahan asin pasakitan kan siring na mga linalang.

²Alagad, Kagurangnan, an saimong banwaan dai mo pinadusahan sa paaging ini; kundi pinahilingan mo sinda nin pagkaherak. Pinadarahan mo sinda nin mga pugo bilang kakanon, sarong managom na kakanon na makakahale kan saindang kagutoman.

³Ginibo mo ini tanganing kan magutom an mga nagsamba sa mga dios-dios, dai sinda makakakan huli kan makauuyam na mga linalang na ipinadara mo sainda. Alagad an saimong banwaan nakamate nin gutom sa kadikit sanang panahon, dangan nagkakan sinda kan masiram na kakanon.

⁴Maninigong magtios nin makuring pangangaipo an mga nang-api, mantang nahiling kan banwaan mo an pagsakit kan saindang mga kaiwal.

⁵Kan an saimong banwaan salakayon nin mangirhat saka maisog na mga halas na nagpoon manggadan huli kan saindang mga kamandag, dai nahaloy an saimong kaanggotan sa pagraot kan saimong banwaan.

⁶Sa kadikit na panahon napasainda an kasakitan na ini bilang patanid. Dangan tinawan mo sinda nin sarong tanda na nakakabolong, an halas na bronse, sa pagpagiromdom sainda kan ipinagboboot kan Katogonan.

⁷An siisay man na maghiling sa tanda na idto, nabolong sa pagkakagat nin halas—nabolong siya bako huli kan saiyang hiniling, kundi huli saimo, an kagtubos kan katawohan.

⁸Sa paaging ini, ipinasabot mo man sa samong mga kaiwal na ika an nagliligtas sa tawo sa anoman na karatan.

⁹An samong mga kaiwal nagadan sa kagat nin mga lukton saka mga langaw; mayo nin paagi tanganing mabolong sinda, huli ta maninigo sindang padusahan kan siring na mga linalang.

¹⁰Alagad an saimong banwaan dai nadaog maski kan mga halas na igwa nin kamandag, huli ta an saimong pagkaherak iyo an nagtabang saka nagbolong sainda.

¹¹Nakagat sinda kan mga halas tanganing magiromdoman ninda an saimong mga pagboot, alagad ilinigtas mo sinda tolos, tanganing dai ka nanggad ninda malingawan asin mamatean ninda an saimong pagkamaboot.

¹²Bakong medisina o panlahid an nagpaomay sainda. Naomayan sinda huli kan saimong tataramon, O Kagurangnan, an tataramon na nakakabolong kan katawohan.

¹³Igwa ka nin kapangyarihan sa buhay saka sa kagadanan; ika an makakadara sa mga tawo sa trangkahan nin kagadanan asin ika man sana an makakatao nin buhay.

¹⁴Pwedeng gadanon nin sarong maraot na tawo an saiyang kapwa, alagad dai niya ini pwedeng buhayon giraray o ikaligtas an kalag kaini sa pagkabilanggo sa kinaban kan mga gadan.

¹⁵Mayo nin siisay man na pwedeng makadulag saimo.

¹⁶An bakong diosnon na mga tawo, na nagsayumang magmidbid saimo bilang Dios, saimong pinadusahan kan dakula mong kapangyarihan. Linamag sinda nin makosog na mga pagbagyo asin pag-uran nin yelo saka gabos natutong sa kalayo.

¹⁷An orog na makangangalas iyo na an kalayo orog na naglaad sa tubig, na iyo kutana an dapat na magsigbo kan kalayo. An gabos na kabagsikan kan naturalesa nagtarabang sa pagdepensa kan matanos.

¹⁸Sarong panahon, naontok an kalayo, tanganing dai magkagaradan an mga linalang na sinugo tanganing padusahan an mga bakong diosnon. An mga tawong idto kaipuhan makasabot na linalamag sinda kan saimong paghukom.

¹⁹Sarong panahon naman, kan an kalayo napalibotan nin tubig, orog idtong naglaad, sarong paglaad na dai pa lamang nangyari kaidto, kaya nagkararaot an mga tinanom sa daga na pinag-erokan kan bakong matanos na mga tawong idto.

²⁰Alagad an saimong banwaan dai nakamate kan kasakitan na ini. Embes kaiyan, tinawan mo sinda kan kakanon nin mga anghel. Hale sa langit ipinadara mo an tinapay na pwede nang kakanon, asin dai na kaipuhan pang lutoon. Maski ano an pagnamit kan lambang saro, nasiraman siya kan kakanon na itinao mo.

²¹An gabos na ini nagpahiling kan mamomoton mong pangataman sa saimong kaakian; nabago an namit kan tinapay sosog sa pagnamit nin lambang saro.

²²An kakanon na idto madaling matunaw arog sa ambon o yelo alagad sa pangyayaring idto dai natunaw maski sa kalayo. Nangyari ini tanganing tukdoan an saimong banwaan na an parehong kalayo na nagraraot kan tinanom kan saindang mga kaiwal kan magbagyo saka mag-uran nin yelo,

²³iyo man an kalayo na hinalean nin kapangyarihan tanganing magkaigwa nin kakanon an saimong matanos na banwaan.

²⁴Linalang mo an kinaban; nagsusunod iyan kan saimong pagboot. Ginagamit kan gabos na linalang an saindang kapangyarihan tanganing padusahan an bakong matanos na mga tawo, alagad nagin mahoyo saka maboot iyan sa mga nagsasarig saimo.

²⁵Ginamit kan bilog na linalang an manlaen-laen na porma tanganing ikapahiling an saimong pagkamatinao sa mga namimibi saimo.

²⁶Nangyari ini, O Kagurangnan, tanganing an banwaan na namomotan mo makanood na dai sinda pinapakakan kan itinanom ninda. An tataramon mo iyo an nag-aataman kan mga nagsasarig saimo.

²⁷An kakanon, na dai naraot kan kalayo, natunaw kan tamaan kan saldang nin aldaw,

²⁸tanganing tukdoan kami na kaipuhan magbangon kami bago magsirang an aldaw, tanganing magpasalamat saimo, dangan magpamibi mantang nag-iitaas an aldaw.

²⁹Alagad an paglaom nin sarong tawo na dai tataong magpasalamat natutunaw siring sa ambon, asin nagmamara siring sa tubig na dai ginagamit.