Read Central Bicolano Wisdom 17 Bible Online

Wisdom 17 - Central Bicolano bible

Wisdom 17

¹O Kagurangnan, makangangalas saka dipisil ipaliwanag an saimong mga paghukom; kaya nalagalag an mga tawong dai tinukdoan manongod kaiyan.

²Kan naghona an mga tawong dai nagmimidbid kan katogonan na nasa irarom kan saindang kapangyarihan an banal mong banwaan, sinda mismo an nabilanggo sa halawig na banggi nin kadikloman. Nabilanggo sinda sa saindang mga harong, harayo sa saimong mayong kataposan na pangataman.

³Naghona sinda na dai nahiling an hilom nindang mga kasalan, na nalipodan an mga ini kan madiklom na kurtina nin pagkalingaw, alagad ngunyan naribong sinda, nahandal nin marahay asin natakot sa saindang mga nahihiling.

⁴Dai nakaolang sa saindang makuring takot an madiklom na kwarto na saindang pinagtatagoan.

⁵An arin man na kalayo mayo nin kapangyarihan sa pagtao sainda nin liwanag, asin an maliwanag kan mga bitoon dai nin naginibo tanganing mahale an diklom na idto.

⁶Mayo nin nakakatakot na liwanag sainda kundi an makakatakot na kalayo, na bakong tawo an nagmakot, asin sa katakotan ninda, nagtubod sinda na an mga bagay na saindang nahiling mas makatatakot ki sa mga bagay na nasa isip ninda.

⁷Nawaraan nin halaga an mga hilingon na bunga kan saindang mga salamangka, asin nawaraan man nin halaga an kadonongan na ipinaghambog ninda.

⁸Nagpahayag sinda na mapapadulag ninda an gabos na natatakotan asin an mga kahelangan nin mga raot an isip, alagad ngunyan sinda mismo an naghelang huli kan makangingising takot.

⁹Maski mayo man nin nangyaring dapat katakotan ninda, alagad natakot sinda sa nagsisingasing na mga halas saka nag-aaging mga hayop na naghaharani sainda.

¹⁰Kaya nagadan sindang nagtatakig sa takot, takot na muklaton an saindang mga mata, alagad dai man ninda ipinirong.

¹¹An kasombikalan sarong katalawan, asin iyo man sana an minakondenar sa sadiri. An sarong tawo na napupurisaw kan saiyang konsyensya danay na mag-iisip nin mga bagay na orog pa karaot ki sa tunay na nangyayari sa mga iyan.

¹²An takot mayo man nin ibang kahulogan kundi an dai paggamit kan tabang na itinatao kan isip.

¹³Kun kulang ka nin tiwala sa isip, masuko ka sa takot na dara kan kamangmangan.

¹⁴Sa bilog na banggi an mga tawong idto dai nangangatorog, maski ngani an banggi mayo man nin kapangyarihan sainda, huli ta hale iyan sa mayong kapangyarihan na kairaroman kan kinaban kan mga gadan.

¹⁵Linamag sinda kan makatatakot na mga bunga nin isip, asin paralisado sindang nagsuko sa takot na hidali sanang nag-abot sainda saka dai ninda pinaglalaoman.

¹⁶Nadismayo an mga tawo asin nabilanggo sa sadiri nindang takot.

¹⁷An mga paraoma, an mga pastor saka an mga trabahador sa kalangtadan nabihag asin nagtios kan parehong palad, huli ta gabos sinda nabilanggo sa kadikloman kan parehong kadenang dai nahihiling.

¹⁸Dai sinda nakahiro sa takot sa nagtataghoy na doros, o sa nag-aawit na mga gamgam sa mga kahoy, o sa naghahagubohob na tubig, o sa tanog kan naghuhurolog na mga gapo, o sa ribok kan dai nahihiling na mga linalang na nagdadaralagan, o sa agrotong kan mga lalaw na hayop, o sa mga aniningal kan kabukidan.

²⁰Sa liwanag kan aldaw, an bilog na kinaban padagos sa saindang trabaho na mayo nin kaolangan.

²¹An mga tawo sanang idto an natahoban kan banggi, sarong pagnamit kan kadikloman nin kagadanan na naghahalat sainda. Saro sindang pagabat sa sainda man sanang sadiri, orog na magabat ki sa kadikloman.