Read Central Bicolano Wisdom 2 Bible Online

Wisdom 2 - Central Bicolano bible

Wisdom 2

¹An mga maraot nasasala kun nagsasaboot sindang, “Halipot an satong buhay asin pano nin kasakitan, dangan kun umabot na an kataposan kan satong buhay dai ta iyan madudulagan. Mayo pang nakabalik hale sa kinaban nin mga gadan.

²Sa dai tinutuyong pangyayari namundag kita, asin kun tapos na an satong buhay, garo man sana kita dai namundag. An satong hinangos garo sana sarong buga nin aso, an satong isip garo sana manok-manok na itinalsik kan nagkukutab-kutab tang puso.

³Dangan kun dai nang laad iyan, magigin abo an satong hawak, asin an satong hinangos magigin kabtang na kan doros.

⁴Sa pag-agi kan panahon, dai na maroromdoman an satong ngaran asin malilingawan na an anoman na ginibo ta. Maagi an satong buhay na garo sana panganoron asin mapapara iyan na garo alopoop sa init kan aldaw.

⁵An panahon ta sa daga garo sana sarong aninong minaagi. Dai madudulagan an aldaw nin satong kagadanan; nakatalaan na iyan asin dai na maliliwat.”

⁶An mga maraot minasabi, “Kaya madya asin mag-ogma kita kan mga marahay na bagay sa buhay, asin mamuhay sa kinaban na ini siring kan kita mga hoben pa asin mayong mga kapurisawan sa buhay!

⁷Inomon ta an pinakamahal na mga arak asin gamiton ta an mga pinakamahamot na olor. Dai ta pagpaligtason an arin man na burak pakalihis kan tig-lipot.

⁸Ikorona nyato an magayon na mga burak bago maluyos an mga iyan!

⁹Gabos kita dapat na mag-ogma asin magwalat nin mga tanda kan satuyang pag-ogma! Utang sato iyan kan buhay!

¹⁰“Apihon nyato an mga dukha, maski matanos sinda. Dai nyato galangan an mga babaeng balo asin an mga gurang nang tawo.

¹¹An kosog iyo an gibohon tang tamang katogonan, huli ta an maluya mayo nin halaga!

¹²Hipaan nyato an mga matanos huli ta nakakaolang sinda sa satong mga gibo. Binabasol ninda kita na nagkasala tumang sa Katogonan ni Moises asin sa mga tradisyon kan satong mga ginikanan.

¹³Nagpapahayag sinda na midbid ninda an Dios asin mga aki sinda nin Kagurangnan.

¹⁴Salungat sinda sa satong mga kaisipan.

¹⁵Habo ta nanggad na mahiling an saindang lalawogon, huli ta an saindang pamumuhay bakong arog kan sa ibang tawo asin dayuhan para sato an saindang mga gawe.

¹⁶Maraot kita para sainda, asin linilikayan ninda an satong mga gawe bilang maati. Nag-oorgulyo sinda na an Dios saindang ama asin nagtutubod sinda na sa kataposan, an mga matanos iyo an magigin maogma.

¹⁷Hilingon ta daw kun totoo iyan! Hilingon ta kun ano an mangyayari kun umabot na an oras nin saindang kagadanan!

¹⁸Kun an mga matanos mga aki mananggad nin Dios, ililigtas niya sinda sa saindang mga kaiwal.

¹⁹Kaya baloon nyato sinda. Tuyatuyaon nyato asin pasakitan sinda tanganing maaraman ta kun mahoyo mananggad sinda asin matinios sa kasakitan.

²⁰Kondenaron ta sinda sa makasosopog na kagadanan, huli ta nagsasabi sinda na iingatan sinda nin Dios.”

²¹Siring kaiyan an pag-isip kan mga maraot na tawo, alagad nasasala sinda. Nabubuta sinda kan sadiri nindang kasombikalan.

²²Dai nanggad ninda nasabotan an mga sekretong katuyohan nin Dios, ni naglaom sa bayad para sa kabanalan asin sa premyo para sa mga banal.

²³Linalang kita nin Dios bako tanganing magadan kundi sosog sa saiyang ladawan.

²⁴Alagad huli sa pagkaori kan Diablo, an kagadanan nakalaog sa kinaban, asin an mga minaapil saiya iyo an magagadan.