Read Central Bicolano Wisdom 3 Bible Online

Wisdom 3 - Central Bicolano bible

Wisdom 3

¹Alagad an mga kalag kan mga matanos iingatan nin Dios asin dai sinda mag-aagi nin kasakitan.

²Sa mata kan mga lolong garo nagagadan an mga matanos, asin an saindang kagadanan pinaghohona na sarong kasakitan.

³Binabayaan kita kan mga matanos, alagad bako iyan kapahamakan; an totoo sinda nasa katoninongan.

⁴Sa paghiling, garo sinda pinadusahan, alagad pano sinda nin paglaom para sa buhay na daing kasagkoran.

⁵Kadikit an saindang padusa alagad dakula an bendisyon na aakoon ninda. Binalo sinda nin Dios asin nahiling na maninigo sinda saiya.

⁶Binalo sinda sa horno siring sa bulawan, asin inako sinda siring sa sarong tinutong na atang.

⁷Pag-abot nin Dios sa paghukom kan mga matanos, magliliwanag sinda arog kan kalayong minasulo sa dagami.

⁸Mamamayo sinda sa mga nasyon saka mga banwaan, asin an Kagurangnan iyo an saindang magigin hade sagkod pa man.

⁹An mga naglalaom sa Dios makakasabot kan katotoohan. An mga maimbod mag-eerok kaiba niya sa saiyang pagkamoot, huli ta maboot siya asin maheherakon sa mga banal na saiyang pinili.

¹⁰Alagad an mga bakong diosnon na tawo papadusahan sosog sa maninigo sa saindang maraot na kaisipan, huli ta nagsombikal sinda sa Kagurangnan asin dai ninda pinahalagahan an matanos.

¹¹An tawong naoongis sa kadonongan saka sa katukdoan magkakaigwa nin miserableng buhay. Mayo siya nin lalaoman. Masasayang an saiyang mga pagpagal asin mayo siya nin magigibong karahayan.

¹²An saiyang agom maluwas na iresponsable asin an saiyang mga aki magigin maraot.

¹³An saiyang mga makoapo mapapasairarom nin sarong maldisyon. Sa Aldaw nin Paghukom, pepremyohan nin Dios an babaeng dai nagkaigwa nin aki alagad dai nadigtaan asin dai nagkasala nin pakikidorog sa bako niyang agom.

¹⁴Paladan man an mga eunuko na dai nadigtaan an mga kamot sa paggibo nin maraot asin dai nag-isip nin laban sa Kagurangnan, huli ta babalosan siya kan saiyang pagkamaimbod asin magkakaigwa siya nin lugar na maogma sa Templo nin Kagurangnan.

¹⁵An mga marahay na gibo nakakaarog sa kahoy na nagtatao nin marahay na bunga. An kadonongan arog sa sarong buhay na gamot na danay na igwa nin supang.

¹⁶Alagad an mga aki sa luwas nin matrimonyo asin an mga aki sa pagdorogan na tumang sa katogonan magkakagaradan tolos.

¹⁷Alagad maski mabuhay sinda sa halawig na panahon, mayo man sindang marahay na aaboton asin dai sinda igagalang kun sinda gurang na.

¹⁸Kun aki pa sindang magadan, mayo sinda nin paglaom o katiwasayan sa Aldaw nin Paghukom.

¹⁹Huli ta mamondo an kataposan kan henerasyon na bakong matanos.