Read Central Bicolano Wisdom 4 Bible Online

Wisdom 4 - Central Bicolano bible

Wisdom 4

¹Mas marahay pang magin banal, maski nangangahulogan iyan sa dai pagkakaigwa nin mga aki. An kabanalan na iyan mimidbidon kan ibang tawo asin mimidbidon nin Dios, dangan maroromdoman sagkod pa man.

²An kabanalan na iyan magigin arogan nin iba; kun mayo iyan, hahanapon ninda. Iyan an pinakamarahay na premyo na magagana nin sarong tawo. Iyan an pinakamarahay sa gabos na ugale na pwedeng makua nin sarong tawo.

³Maski dakul pang aki an mamundag sa luwas nin matrimonyo, mayo sindang marahay na aabotan. Ilehitimo sinda; dai sinda magkakaigwa nin hararom na pundasyon sa buhay asin dai sinda makakagamot nin hararom.

⁴Siring sa mga kahoy na bakong hararom an gamot, minasupang sinda sa halipot na panahon, alagad hinihiro sinda kan doros asin ginagabot kan bagyo.

⁵Nababari an saindang mga sanga bago tumagas an mga iyan; an saindang mga bunga dai lamang nahihinog, asin mayo lamang nin pakinabang.

⁶Sa Aldaw nin Paghukom, an mga aki sa luwas nin matrimonyo magsasaksi sa kasalan kan saindang mga magurang.

⁷Alagad an mga matanos na tawo makakakua nin pahingalo, maski magadan sindang aki pa.

⁸Inoomaw an pagkagurang, bako sana huli ta an tawo nabuhay sa halawig na panahon.

⁹An kadonongan saka an katanosan iyo an mga tanda nin kauswagan na kaiba kan paggurang nin tawo.

¹⁰Igwa kaidto nin sarong lalaki na an ngaran Enoc, na nawilihan asin namotan nin Dios. Mantang nag-eerok pa si Enoc sa kaibahan kan mga parakasala kinua siya nin Dios

¹¹tanganing an saiyang isip asin kalag dai madigtaan kan karatan asin kaputikan. (

¹²Aram nyato na an mga tawo pwedeng madagka kan maraot, sagkod na dai na ninda mamidbidan an tama maski nahihiling na ninda iyan. An mga inosenteng tawo pwedeng madagka nin ngana-nganang kamawotan, sagkod na mayo na sindang ibang maisip kundi an sadiri nindang kagustohan.)

¹³Nakamtan ni Enoc sa laog nin kadikit sanang panahon an kapanoan nin buhay alagad dai iyan makakamtan nin ibang tawo maski sa bilog nindang pagkabuhay.

¹⁴Nawilihan nin Kagurangnan an buhay ni Enoc kaya hinale niya ini tolos sa tahaw kan kinaban na masombikal. Aram kan mga tawo an saiyang paghale, alagad dai ninda iyan nasabotan. Dai nanggad sinda nakanood kan adal

¹⁵na an Dios maboot asin maheherakon sa sadiri niyang banwaan; iniingatan niya an saiyang mga pinili.

¹⁶Maski gadan na asin mayo na an mga matanos na tawo, kinokondenar pa ninda an mga masombikal na tawo na padagos pang nabubuhay. Kun gurang na an mga masombikal na tawo, sosopogon sinda kan mga kaakian na nagkamit na kan kapanoan nin buhay.

¹⁷An mga madonong pwedeng magadan na aki pa, alagad an mga masombikal dai nanggad makakasabot na iyan an paagi nin Kagurangnan tanganing kuahon sinda asin ingatan.

¹⁸Pinag-oolog-olog kan mga masombikal an kagadanan kan sarong madonong, alagad ngapit, sinda an ngingisihan nin Kagurangnan. Kun gadan na sinda, dai sinda tatawan nin maninigong paglubong. Oolog-ologon sinda sagkod pa man maski kan mga gadan.

¹⁹Itatapok sinda nin Dios sa daga asin dai na sinda makakataram. Siring sa mga edipisyong natatanyog sagkod sa mga pundasyon, marurumpag sinda asin magkakaigwa nin makuring kasakitan. Dangan dai na sinda magigiromdoman.

²⁰Pano nin takot na maatubang sinda sa Paghukom, saen ihahayag an saindang mga kasalan; kokondenaron sinda kan sadiri nindang mga gibong tumang sa katogonan.