Read Central Bicolano Wisdom 5 Bible Online

Wisdom 5 - Central Bicolano bible

Wisdom 5

¹Sa aldaw na iyan, an matanos na tawo, na pano nin paglaom, matindog sa atubang kan mga nag-api saiya asin nag-olog-olog kan saiyang mga ginibo.

²Mangalas sinda na mahiling siyang ligtas asin magtatakig sinda sa dakulang takot.

³Dangan mabasol sinda huli kan saindang mga ginibo, asin mag-aagrangay na magsisinabihan,

⁴“Iyo ini an tawong pinag-olog-olog nyato. Naghona kita na saro siyang ngingisihan. Mga lolong kita! Naghona kita na sarong kalolongan an saiyang buhay asin dai ta siya inomaw kan siya nagadan.

⁵Ngunyan uya siya digdi, saro sa mga aki nin Dios, na igwa nin lugar sa kaibahan kan mga banal.

⁶Kita palan an nalagalag sa salang dalan. Dai kita namuhay sa liwanag nin katanosan; dai nanggad nagliwanag sato an saldang kaiyan.

⁷Sa bilog tang pagkabuhay, nalagalag kita sa dalan nin pagsalungat sa katogonan asin sa dalan nin kapahamakan; naglakaw kita sa dai midbid na mga kadlagan, embes na magsunod sa dalan nin Kagurangnan.

⁸Nagin mapaabaw-abaw kita—naghambog na mayaman kita—asin ngunyan, anong karahayan an itinao kaiyan sato?

⁹Siring sa sarong anino, mayo na iyan gabos; siring sa huring-huding na nadadangog dangan nalilingawan.

¹⁰“An sarong barko minaagi sa mga alon nin dagat, alagad kun nakaagi na iyan, mayo lamang nin tanda kan saiyang inagihan; mayo nin gira kaiyan sa mga alon.

¹¹An sarong gamgam minalayog sa kaitaasan, alagad mayo nin tanda kan saiyang inagihan. Marikas na minalayog na naglulunad sa doros sa paggamit kan saiyang mga pakpak, alagad mayo nin tanda na nag-agi siya diyan.

¹²Binabanga an doros kan sarong bosog pasiring sa patatamaan kaiyan, alagad sineserahan giraray kan doros an inagihan kan bosog, kaya mayo nin nakakaaram kan inagihan kaiyan.

¹³Siring man kita kaiyan—namundag kita dangan nagadan. Dai kita nagwalat nin tanda nin kabanalan; embes kaiyan, naraot kita kan satong kasombikalan.”

¹⁴An paglaom kan masombikal arog sa ata na pinapalid kan doros; arog sa subo nin dagat na nawawara sa bagyo; arog sa aso na iwinawarak kan doros. An saindang paglaom minaagi sana arog sa giromdom nin sarong bisita na nagdalaw sa laog nin sarong aldaw dangan naghale pagkaaga.

¹⁵Alagad an mga matanos mabubuhay sagkod pa man. An saindang premyo iyo an Kagurangnan; aatamanon sinda kan Kahorohalangkawe.

¹⁶Tatawan niya sinda nin kahirasan sa kahadean asin nin magayon na koronang alahas. Iingatan niya sinda kan saiyang mapangyaring kamot.

¹⁷Maigot siyang makikilaban sagkod na madaog an saiyang mga kaiwal, asin gagamiton niya an gabos na linalang bilang armas.

¹⁸An katanosan iyo an gigibohon niyang pantahob sa daghan, asin an tunay na hustisya iyo an isusulot niyang helmet;

¹⁹an kabanalan iyo an saiyang dai malalagbas na kalasag.

²⁰An saiyang dai maontok na kaanggotan tataison niya bilang espada, asin tatabangan siya kan kabagsikan nin naturalesa sa pakilaban sa mga lolong na nagsasalungat saiya.

²¹Tatamaan nin kikilat an tuyong papatamaan kaiyan, na garo baga ginibong pana nin Kagurangnan an panganoron dangan nagpalayog nin mga bosog.

²²Makosog na mahugpa sa mga kaiwal an uran nin yelo. Marikas na maabot sainda an baha kan anggot na mga salog saka dagat.

²³Makosog na mga bagyo an mapadpad sainda siring sa ata. An pagkawara nin galang sa katogonan iyo an maraot sa bilog na daga; an mga maraot na gibo iyo an mapabagsak sa mga hade.