Read Central Bicolano Wisdom 6 Bible Online

Wisdom 6 - Central Bicolano bible

Wisdom 6

¹Kaya kamo, mga hade, mga pamayo kan bilog na kinaban, dangoga nindo an sakuyang sasabihon asin adalan nindo.

²Dakul na daga an saindong pinaghahadean asin nagpapaabaw-abaw kamo huli ta dakul na tawo an saindong nasasakopan.

³Alagad an kapangyarihan na iyan itinao man sana saindo nin Kagurangnan na Kahorohalangkawe. Sisiyasaton niya kun ano an ginigibo nindo asin kun ano an saindong mga plano.

⁴Huli ta bilang mga sorogoon kan saiyang kahadean, bakong matanos an ginibo nindong paghahade; dai nindo inotob an saiyang togon asin dai kamo naglakaw sosog sa kabotan nin Dios.

⁵Matios kamo nin makuring padusa na hidaling maabot. Orog na makuri an paghukom sa mga igwa nin kapangyarihan.

⁶An ordinaryong mga tawo pwedeng patawadon kan sala nindang mga gibo, alagad an mga igwa nin kapangyarihan maatubang sa makuring paghukom.

⁷An Kagurangnan nin gabos dai natatakot sa kiisay man, maski gurano siya kadakula. Siya an kaggibo kan gabos, dakula man o sadit, asin mayo siya nin pinapalaen.

⁸Alagad mas makuri an paghukom niya sa mga igwa nin kapangyarihan.

⁹Kaya, O makakamhan na mga hade, para sa saindo an isinusurat ko, tanganing manodan nindo an kadonongan asin dai kamo masala.

¹⁰Banal an mga bagay na ini asin kun pahalagahan nindo bilang banal an mga ini, magigin banal man kamo. Kun manodan na nindo an adal na ini, makakadepensa kamo sa Aldaw nin Paghukom.

¹¹Kaya gibohon nindong saindong kayamanan asin kaogmahan an sakong katukdoan, asin magigin marahay an saindong pakanood.

¹²An Kadonongan nagliliwanag nin marahay asin dai nanggad magdidiklom; pasil siyang makua kan mga namomoot asin naghahanap saiya.

¹³Madali siyang magpamidbid sa kiisay man na nagmamawot saiya.

¹⁴Amay kang magbuhat sa paghanap saiya asin dai ka madidipisilan, huli ta makukua mo siya na nagtutukaw sa saimong trangkahan.

¹⁵An pagpako kan saimong kaisipan sa Kadonongan iyo an kapanoan nin pakasabot. Kun hanapon mo siya, madali kang makakakua nin katoninongan nin isip,

¹⁶huli ta hinahanap niya an mga maninigo sa saiya, asin makukua ka niya maski saen na lugar. Maboot siya asin maiba siya sa lambang kaisipan mo.

¹⁷An kapinonan kan Kadonongan iyo an tudok sa pusong pagmawot na makanood. An pagmawot sa Kadonongan iyo an pagkamoot saiya;

¹⁸an pagkamoot saiya iyo an pag-otob kan saiyang mga togon; an pag-otob kan saiyang mga togon iyo an kasigurohan kan buhay na daing kataposan;

¹⁹an buhay na daing kataposan iyo an magdadara saimo harani sa Dios.

²⁰An pagmawot na ini para sa Kadonongan iyo an maandam saimo sa pamamayo nin sarong kahadean.

²¹Kaya, kamo na mga namamayo nin mga nasyon, kun pinapahalagahan nindo an saindong mga trono asin mga setro, omawon nindo an Kadonongan tanganing maghade kamo sagkod pa man.

²²Tataraman ko kamo kun ano an Kadonongan, asin kun paano siya nagkaigwa nin buhay. Mayo akong tatagoon na sekreto saindo. Sososogon ko an saiyang kasaysayan magpoon sa kapinonan nin paglalang, asin an pagsabot saiya malinaw na ipapahiling ko sa gabos. Ipapahayag ko an gabos na katotoohan.

²³Mayo nin pagkaori na mahiro sako tanganing dai ko ipahayag an gabos. An pagkaori dai nanggad magkakaibahan saka an kadonongan.

²⁴Kun mas dakul an tawong madonong, orog na ligtas an kinaban. An sarong hade na igwa nin pag-iisip, malalaoman sa pag-ataman kan saiyang mga tawohan.

²⁵Kaya, adalan nindo an itutukdo ko, asin pakikinabangan nindo iyan.