Read Central Bicolano Wisdom 7 Bible Online

Wisdom 7 - Central Bicolano bible

Wisdom 7

¹Arog sa arin man na tawo, igwa man ako nin kagadanan. Guminikan ako sa enot na lalaki, na linalang hale sa alpog nin daga. Ipinangidam ako hale sa banhi nin sarong lalaki sa kaogmahan nin pag-inagoman. Sa laog nin siyam na bulan, an sakong laman nahaman sa dugo kan tulak nin sakuyang ina.

³Kan ako namundag, nagluwas ako sa kinaban arog man kan ibang tawo. Hinangos ko an parehong doros na hinahangos nyato gabos; arog sa iba, sarong paghibi man an enot na nadangog sako.

⁴Pinatos ako sa lampin asin inataman.

⁵Mayo nin hade na namundag sa paaging laen kaini.

⁶Huli ta para sato gabos, saro sana an paagi nin paglaog sa kinaban, asin saro man sana an paagi nin pagluwas diyan.

⁷Kaya namibi ako asin tinawan nin pakasabot. Nag-apod ako sa Dios asin nag-abot sako an espiritu nin Kadonongan.

⁸Pinahalagahan ko siya orog ki sa mga setro asin mga korona. Mayong halaga an kayamanan kun ibabaing saiya.

⁹An halaga niya dai mapapantayan kan arin man na mahalagang alahas; sa kataed kan Kadonongan, an gabos na bulawan sa kinaban garo sana dikit na baybay, asin an plata garo sana laboy.

¹⁰Pinahalagahan ko siya orog ki sa karahayan nin hawak asin kagayonan. An kaliwanagan niya dai nanggad nagdidiklom, asin pinili ko siya orog ki sa arin man na liwanag.

¹¹Kan mag-abot sako an Kadonongan, kaiba niya an gabos na marahay na bagay. Dinarahan niya ako nin dai mabilang na kayamanan.

¹²Naogma ako sainda gabos huli ta dinara sinda gabos sako nin Kadonongan. Dai ko pa kaidto aram na siya an ginikanan kaini gabos.

¹³Tudok sa puso akong nag-adal saiya, asin ngunyan naoogma akong ihiras an sakuyang nanodan.

¹⁴Mayo nin siisay man na makakaubos kan kayamanan nin Kadonongan. An nakakakua saiya nagigin katood nin Dios; naooyonan nin Dios an anoman na nanonodan nin siisay man hale sa Kadonongan.

¹⁵Itugot logod nin Dios na an sakong mga kaisipan magin maninigo sa sakong nanodan, asin an sakong itataram magin sosog logod sa saiyang kabotan. Siya an giya nin Kadonongan; tinatabangan niyang magin tama an mga madonong.

¹⁶Kita asin an satong mga tataramon nasa irarom kan saiyang kapangyarihan; siring man an gabos tang pakasabot saka abilidad.

¹⁷Siya an nagtao sako nin tunay na pakaaram kan gabos na kabagsikan nin naturalesa: an estruktura kan kinaban; an mga gibo kan mga kabtang kaiyan;

¹⁸an paghaman kan kalendaryo huli sa mga hiro kan aldaw, sa pagribay kan mga panahon,

¹⁹sa kaboronyogan nin mga bitoon asin sa pagtalibong kan mga taon.

²⁰Itinukdo niya sako an naturalesa kan gabos na buhay na linalang, an ugale kan lalaw na mga hayop, an kosog kan mga doros, an kapangyarihan kan isip nin mga tawo, an manlaen-laen na klase nin tinanom asin an gamit kan mga gamot kaiyan bilang medisina.

²¹Nanodan ko an mga bagay na hilom asin an mga bagay na midbid na,

²²huli ta an nagtukdo sako iyo an Kadonongan, na iyo an naghaman kan gabos. Banal asin intelihente an espiritu nin Kadonongan. Saro sana an saiyang naturalesa, alagad ipinapahayag kaiyan an sadiri sa manlaen-laen na paagi. Bako iyan gibo sa anoman na materyal na bagay, asin talingkas iyan na naghihiro saen man na direksyon. Malinaw iyan, malinig asin igwa nin pagtubod sa sadiri; dai iyan maaano. Namomoot iyan sa marahay; mapanas iyan asin dai nadadaog;

²³maboot asin katood nin katawohan. Masasarigan iyan asin sigurado, patin mayo nin kahandalan. Igwa iyan nin kapangyarihan sa gabos asin nahihiling an gabos. Linalagbas kaiyan an gabos na intelihente asin dalisay na espiritu, maski gurano pa kadelikado kaiyan.

²⁴Mas pasil an paghiro kan Kadonongan ki sa hiro mismo; dalisay nanggad siya kaya pwedeng malagbas an gabos.

²⁵Saro siyang hinangos kan kapangyarihan nin Dios—sarong dalisay asin nagkikinang na bulos nin kamurawayan hale sa Makakamhan, kaya mayo nin arin man na maati na pwedeng makalaog sa Kadonongan.

²⁶Siya an saldang kan daing kataposan na liwanag; an daing digtang salming kan mga gawe asin karahayan nin Dios.

²⁷Maski solo sana kun minahiro an Kadonongan, alagad pwede niyang gibohon an gabos. Ginigibo niyang bago an gabos, mantang siya mismo dai nagbabago. Sa lambang henerasyon, linalaog niya an kalag kan mga banal na tawo, asin ginigibo niya sindang mga katood saka mga propeta nin Dios.

²⁸Mayong ibang namomotan an Dios kundi an mga tawong nabubuhay na igwa nin Kadonongan.

²⁹An Kadonongan orog na magayon ki sa aldaw asin sa gabos na kaboronyogan nin mga bitoon. Mas marahay pa siya ki sa mismong liwanag,

³⁰huli ta danay na sinusunod kan banggi an aldaw, alagad an Kadonongan dai nanggad madadaog kan karatan.