Read Central Bicolano Wisdom 8 Bible Online

Wisdom 8 - Central Bicolano bible

Wisdom 8

¹An dakula niyang kapangyarihan nakakaabot sa gabos na poro kan daga, asin ginigibo niyang marahay an orden kan gabos na bagay.

²Namotan ko an Kadonongan asin hinanap ko siya poon kan ako hoben pa; minawot ko siyang magin nobya ko. Namotan ko an saiyang kagayonan.

³Ipinagmumuraway niya an noble niyang pagkamundag huli kan saiyang pakiiba sa Dios, an Kagurangnan nin gabos, na namomoot saiya.

⁴Aram niya an mga misteryo nin Dios, asin katabang siya sa mga gibo nin Dios.

⁵Marahay daw an pagkaigwa nin kayamanan sa buhay na ini? Mayo nang mas makakapayaman pa saimo ki sa Kadonongan, na nagpapahiro sa gabos.

⁶Mahalaga daw an pagkaigwa nin pakaaram? Mayo nang mas marahay ki sa Kadonongan, na nagtao kan porma sa gabos na igwa nin buhay.

⁷Namomoot ka daw sa hustisya? An gabos na kabanalan bunga kan gibo nin Kadonongan: hustisya, kaisogan, pakapugol sa sadiri asin pakasabot. An buhay mayo nang ibang mas mahalaga pang ikakatao kundi an mga ini.

⁸Boot mong magkaigwa nin mahiwas na eksperyensya? Aram kan Kadonongan an mga adal kan mga nakaaging panahon asin ikakasabi niya an mga bagay na maabot. Aram niya an kahulogan kan mga sinasabi nin tawo, asin an kasimbagan kan mga problema. Aram niya an mga milagro na gigibohon nin Dios, asin kun ano an magigin bunga kan mga panahon saka mga henerasyon.

⁹Kaya nagdesisyon akong ipag-iba sa harong an Kadonongan tanganing mag-erok na kaiba ko, huli ta aram kong tatawan niya ako nin marahay na mga hatol asin papakosogon niya an sakong boot sa panahon nin kasakitan saka kamondoan.

¹⁰Nagsaboot ako, “Huli saiya, oomawon ako saen man na katiriponan. Maski hoben pa ako, igagalang ako kan mga gurang.

¹¹Mahihiling ninda na marahay an sakong mga kapahayagan, asin hahangaan ako kan mga pamayo.

¹²Kun mag-alo ako, hahalaton ninda akong magtaram, asin kun nagtataram ako, magdadangog sinda. Maski halawig pa an sakong pagtaram, magdadangog sinda nin marahay.

¹³Huli sa Kadonongan makakamtan ko an buhay na daing kasagkoran. Magdadanay akong buhay sa giromdom kan mga masunod na henerasyon.

¹⁴Papamayohan ko an mga banwaan asin mga nasyon;

¹⁵an natatakotan na mga namamayo matatakot kun madangog ninda an sakong ngaran. Mababantog ako bilang sarong marahay na hade asin sarong maisog na soldados.

¹⁶Pagpuli ko sa harong, magkakaigwa ako nin katoninongan sa kaibahan nin Kadonongan, huli ta sa kaibahan niya, mayo nin kasakitan o kulog kundi kaogmahan sana asin kagayagayahan.”

¹⁷Kaya inisip ko an mga bagay na ini: an magin agom nin Kadonongan nangangahulogan nin buhay na daing kasagkoran;

¹⁸an mamoot saiya tunay na kaogmahan; an pag-arog kan saiyang mga gibo daing sukol na kayamanan; an masakaibahan niya tunay na pakasabot, asin an makaolay siya, kaomawan. Dangan nagdesisyon akong kuahon an Kadonongan bilang nobya ko.

¹⁹Nagin marahay an sakong pagkatawo maski kan hoben pa ako. Nagin paladan ako sa pag-ako nin sarong marahay na kalag, o sa sarong pagtaram, tinawan ako nin marahay na hawak huli ta marahay ako.

²⁰Alagad nasabotan ko na dai nanggad ako makakaako nin Kadonongan sagkod na dai iyan itao sako nin Dios—asin an sakong pakaaram na an Dios sana an makakatao kaiyan sako, sarong tanda nin pakasabot. Kaya namibi ako asin nakimaherak sa Kagurangnan sa bilog kong puso: