Read Central Bicolano Wisdom 9 Bible Online

Wisdom 9 - Central Bicolano bible

Wisdom 9

¹“O Dios nin sakong mga ginikanan, maheherakon na Kagurangnan, sa tataramon mo nalalang an gabos.

²Sa saimong Kadonongan an tawo ginibo mong magin hade kan bilog na linalang,

³tanganing paghadean an kinaban sa kabanalan saka katanosan, asin tanganing magpahayag kan tunay na hustisya.

⁴Tawan sako an Kadonongan na nagtutukaw sa kataed kan saimong trono; tawe ako nin lugar sa kaibahan kan saimong kaakian.

⁵Oripon mo ako, siring na nagin oripon mo an sakong ina. Tawo sana ako. Bako akong makosog, asin magigin halipot sana an sakong buhay. Dikit sana an nasasabotan ko sa paghukom asin sa Katogonan.

⁶Maski mayo nin kaninan an sarong tawo, ibibilang man giraray siya na mayo nin halaga kun mayo siya kan Kadonongan na hale saimo.

⁷Pinili mo ako na magin hade nin saimong banwaan, asin magin hukom kan saimong mga aking lalaki saka babae.

⁸Pinagbotan mo akong magtugdok nin sarong templo sa banal mong bukid, asin magtugdok nin sarong altar sa Jerusalem, an syudad na pinili mong erokan. Sarong kopya iyan kan banal na templo sa langit na inandam mo poon pa sa kapinonan.

⁹Kaiba mo an Kadonongan, asin aram kaini an saimong mga gibo; yaon na siya kan lalangon mo an kinaban. Aram niya kun ano an nawiwilihan mo, kun ano an matanos sosog sa saimong mga katogonan.

¹⁰Sugoa siya hale sa banal na kalangitan, hale sa mamurawayon mong trono, tanganing magtrabaho kaiba ko, asin tanganing manodan ko kun ano an nawiwilihan mo.

¹¹Midbid niya asin sabot an gabos na bagay; may kadonongan na gigiyahan niya ako sa gabos kong gibo. Babantayan ako kan saiyang kamurawayan.

¹²Dangan an sakong mga gibo magigin maninigong akoon. Matanos na huhukoman ko an saimong banwaan dangan magigin maninigo ako kan trono nin sakong ama.

¹³“Siisay daw an pwedeng makanood kan kabotan nin Dios?

¹⁴Kulang an isip nin tawo para sa trabahong ini, asin dai kita nakakasiguro na mangyayari an satong mga plano,

¹⁵huli ta an satong mga kalag nagagabatan kan magagadanon tang mga hawak. An satong daganon na hawak nakakapagabat sa satong mahigos na isip.

¹⁶An magigibo ta sana iyo an pag-ukod kan mga bagay sa daga; kaipuhan na maghingowa kita na masabotan an mga bagay na harani sato. Siisay, kun siring, an pwedeng maglaom kan langitnon na mga bagay?

¹⁷Mayo nanggad nin nakasabot kan saimong kabotan, sagkod na dai mo siya tinawan nin Kadonongan, asin sagkod na dai mo ipinadara an saimong banal na espiritu hale sa langit.

¹⁸Sa paaging ini, napamugtak sa tamang dalan an mga tawo sa daga, saka nakanood kan nawiwilihan mo, asin ilinigtas kan Kadonongan.”