Read Central Bicolano Sirach 1 Bible Online

Sirach 1 - Central Bicolano bible

Sirach 1

¹Hale sa Kagurangnan an gabos na kadonongan, asin an Kadonongan kaiba niya sagkod lamang.

²Siisay an makakabilang kan tagdo nin uran o kan baybay sa baybayon? Siisay an makakabilang kan mga aldaw kan daing kapinonan saka daing kataposan na panahon?

³Gurano kahalangkaw an langit? Gurano kahiwas an daga? Gurano kahararom an dagat? Gurano katotoo an Kadonongan? Igwa daw nin tawong makakasimbag kaining mga kahapotan?

⁴Linalang an kadonongan bago an gabos; an pakasabot danay nang buhay.

⁶Siisay na an pinahilingan kun saen naggigikan an Kadonongan? Igwa daw nin nakakasabot kan saiyang katusohan?

⁸Igwa sana nin sarong madonong, asin kaipuhan magtindog kita na may pagkatakot sa atubang kan saiyang trono.

⁹An Kagurangnan mismo an naglalang kan Kadonongan; nahiling niya ini asin namidbidan an halaga kaini, kaya pinano niya nin kadonongan an gabos niyang ginibo.

¹⁰Hinirasan niya nin Kadonongan an gabos na tawo, alagad orog an itinao niya sa mga namomoot saiya.

¹¹An pagkaigwa nin takot sa Kagurangnan sarong onra saka orgulyo; sarong korona nin kaogmahan saka kagayagayahan.

¹²An pagkaigwa nin takot sa Kagurangnan nakakapaogma sa puso; nagtatao nin halawig saka maogmang buhay.

¹³Sa kataposan nin saiyang buhay magigin marahay an gabos para sa may pagkatakot sa Kagurangnan. Bebendisyonan siya nin Dios sa aldaw nin saiyang kagadanan.

¹⁴An pagkaigwa nin takot sa Kagurangnan iyo an kapinonan nin Kadonongan. An Kadonongan itinao sa maimbod maski kan nasa tulak pa kan saindang ina.

¹⁵Kaiba tang namuhay siya poon kan mga suanoy na panahon, asin sasarigan siya kan mga henerasyon pang madatong.

¹⁶An pagkaigwa nin takot sa Kagurangnan iyo an kapanoan nin Kadonongan; totoong binabasog niya kita kan saiyang mga regalo

¹⁷asin pinapano an satong mga harong saka kamalig kan gabos na mawoton nyato.

¹⁸An pagkaigwa nin takot sa Kagurangnan iyo an burak nin Kadonongan na minabukad kaiba an katoninongan saka an marahay na hawak.

¹⁹Ipinapadara niya an pakaaram saka pakasabot arog kan uran, asin pinapadakula an onra kan mga minaako saiya.

²⁰An pagkaigwa nin takot sa Kagurangnan iyo an gamot nin Kadonongan; an saiyang mga sanga iyo an halawig na buhay.

²²An bakong matanos na kaanggotan dai nin kapatawadan; iyan an madara saimo sa kapahamakan.

²³Maghalat ka asin magin matinios sagkod na umabot an tamang panahon, dangan maoogma ka huli sa ginibo mong iyan.

²⁴Pag-alo sagkod na umabot an tamang panahon nin pagtaram, asin mimidbidon ka huli kan saimong marahay na kaisipan.

²⁵An kadonongan igwa nin nasasaray na mararahay na kasabihan, alagad an mga parakasala nauuyam sa kabanalan.

²⁶Kun boot mong magin madonong, otoba an mga kabotan nin Kagurangnan, asin tatawan ka niya nin nagsusupay na kadonongan.

²⁷Kadonongan an pagkaigwa nin takot sa Kagurangnan asin saro man na katukdoan. An Kagurangnan nawiwili sa kaimbodan saka sa kapakumbabaan.

²⁸Magin maimbod ka sa paggibo kan hinahagad kan saimong relihiyon; kun nagsasamba ka sa Kagurangnan, giboha iyan sa bilog mong puso.

²⁹Magin maingat ka dapit sa saimong sinasabi asin dai ka magsagin-sagin.

³⁰Dai ka magpaabaw-abaw ta tibaad bumagsak ka dangan masopgan. An Kagurangnan an mahayag kan saimong mga sekreto asin siya man an mapaibaba saimo sa atubang kan katiriponan, huli ta dai ka nagduman na may pagkatakot sa Kagurangnan, kundi igwang pusong pano nin kadayaan.